Dokumenti tronditës i Shtëpisë së Bardhë, i cili kritikoi ashpër Evropën duke paralajmëruar madje rënien apo zhdukjen e saj, mori përgjigjen e parë nga Brukseli.

“Kur bëhet fjalë për vendime që prekin BE-në, ato merren nga BE-ja dhe për BE-në. Përfshirë vendimet që kanë të bëjnë me autonominë tonë rregullatore, mbrojtjen e lirisë së shprehjes dhe rendin ndërkombëtar të bazuar në rregulla. Aleatët janë më të fortë së bashku”, deklaroi një zëdhënës i Komisionit Evropian.  

Ky është reagimi i parë institucional i Brukselit pasi Trump firmosi Strategjinë Kombëtare të Sigurisë Amerikane, ndërsa zëra të tjerë brenda Unionit reaguan të premten dhe këtë të shtunë. Procesi i zhdukjes së civilizimit evropian për të cilin flet edhe dokumenti i shtëpisë së bardhë nuk është një lajm i ri sipas Kryeministres italiane Meloni.

"Evropa duhet të kuptojë se, nëse dëshiron të jetë e madhe, duhet të jetë në gjendje të mbrohet vetë. Kur ia beson sigurinë dikujt tjetër, duhet ta dish se ka një çmim për t’u paguar. Unë e kam thënë prej kohësh. Për ne kjo është një mundësi: një mundësi që ka një kosto ekonomike, por prodhon liri politike”, u shpreh Meloni më pas në kontekstin e sigurisë, vetëm pak ditë pasi Reuters tha se SHBA i ka kërkuar një delegacioni evropian që kontinenti i vjetër të marrë nën kontroll të plotë Nato-n brenda vitit 2027. 

Ndryshe i ka lexuar kritikat amerikane Kaja Kallas Zëvendëspresidentja e Komisionit Evropian. 

"Ka shumë kritika, por besoj se disa prej tyre janë të vërteta: nëse shikon Evropën, vëren se ajo e ka nënvlerësuar fuqinë e vet ndaj Rusisë. Duhet të kemi më shumë besim te vetja. Mendoj se nuk kemi qenë gjithmonë dakord për disa çështje, por besoj se parimi i përgjithshëm mbetet i vlefshëm. Ne jemi aleatët më të mëdhenj dhe duhet të qëndrojmë të bashkuar”, shtoi Kallas.

Në dokumentin e strategjisë për sigurinë kombëtare të firmosur nga Donald Trump këtë javë, shprehet synimi që Amerika të distancohet së qeni një akto aktiv sidomos në konlfiktet globale. Sa u takon kritikave ndaj BE, ato u referohen kryesisht rregullave për emigracionin, të cilin administrata amerikane e sheh si një faktor që do të sjellë zhdukë civilizimin evropian brenda 20 viteve të ardhshme.