Gjykata e Lartë e Shteteve të Bashkuara ka lëshuar një urdhër urgjent që i lejon përkohësisht administratës Trump të mbajë pezull miliarda dollarë fonde për ndihmat ushqimore që përdoren nga miliona amerikanë me të ardhura të ulëta.

Shtëpia e Bardhë iu drejtua gjykatës më të lartë të vendit pasi një gjykatë më e ulët kishte vendosur që Programi Shtetëror i Asistencës Ushqimore (SNAP), i njohur ndryshe si “food stamps” (kuponë ushqimorë), duhet të paguhej plotësisht për përfituesit deri të premten.

Programi është lënë në pasiguri për shkak të mbylljes së pjesshme të qeverisë federale (“shutdown”), ndërsa administrata Trump argumenton se mund të përballojë vetëm financimin e pjesshëm të tij.

Vendimi i së premtes nënkupton se 4 miliardë dollarë (rreth 3,04 miliardë paund) mund të mbahen përkohësisht pezull, deri në zhvillimin e seancave të tjera gjyqësore. Programi SNAP u ofrohet rreth 42 milionë amerikanëve — afërsisht një në tetë persona — dhe kushton pothuajse 9 miliardë dollarë (rreth 6,9 miliardë paund) në muaj.

Të enjten, një gjykatës nga Rhode Island, John McConnell, akuzoi administratën Trump se po ndalonte ndihmën ushqimore “për arsye politike” dhe tha se, pa këtë ndihmë, “16 milionë fëmijë janë menjëherë në rrezik urie”. Ai urdhëroi administratën që ta paguante programin tërësisht.

Vendimi i së enjtes pasoi një tjetër vendim të mëparshëm, që i kërkonte administratës të përdorte fondet rezervë për të financuar të paktën pjesërisht programin për muajin nëntor.

Saga ligjore nisi pasi Departamenti Amerikan i Bujqësisë (USDA), që mbikëqyr programin SNAP, kishte njoftuar se përfitimet do të ndaleshin në nëntor për shkak të mungesës së fondeve që shkaktoi mbyllja e qeverisë.

Përpara se të ndërhynte Gjykata e Lartë, USDA kishte deklaruar se po përpiqej të zbatonte urdhrat e ndryshëm gjyqësorë dhe po merrte masa për të shpërndarë fondet e plota.

Gjyqtarja e Gjykatës së Lartë, Ketanji Brown Jackson, lëshoi urdhrin vonë të premten — të njohur si “pezullim administrativ” — i cili ngrin përkohësisht vendimin e gjykatës më të ulët për dy ditë, ndërsa avokatët e qeverisë përgatisin apelimin.

Mosmarrëveshja mbi financimin e ndihmës ushqimore është kthyer në një nga përplasjet më të ashpra gjatë mbylljes më të gjatë të qeverisë në historinë e SHBA-së.

Punonjësit e qeverisë nuk kanë marrë pagë për më shumë se një muaj dhe transporti ajror është futur në kaos, pasi ligjvënësit demokratë dhe republikanë nuk po arrijnë marrëveshje për të financuar qeverinë.

Disa shtete kanë përdorur rezervat e tyre financiare për të vazhduar pagesat e SNAP, të cilat u japin përfituesve rreth 6 dollarë në ditë përmes kartave elektronike të parapaguara që mund të përdoren në dyqanet ushqimore.

Megjithatë, disa shtete kanë deklaruar se nuk janë në gjendje të zëvendësojnë fondet e humbura nga qeveria federale.