SHBA: OKB të dënojë testet raketore të Phenianit

SHBA i ka bërë thirrje Këshillit të Sigurimit të OKB-së që të dënojë vargun e fundit të testeve raketore të kryera nga Koreja e Veriut.

“Ne i bëjmë thirrje secilit anëtar të këtij Këshilli që të bashkohet me ne për të dënuar me forcë aktivitetet e paligjshme të Phenianit dhe ta nxisë atë të angazhohet në rrugën diplomatike”, tha Linda Thomas-Greenfield, ambasadorja e SHBA në OKB, gjatë një konferencë të Këshillit të Sigurimit në Nju Jork.

Kërkesa e saj erdhi pasi Pheniani të hënën lëshoi dy raketa balistike të dyshuara me rreze të shkurtër veprimi drejt Detit Lindor, siç njihet edhe Deti i Japonisë. Rezolutat e OKB-së e ndalojnë Korenë e Veriut të testojë raketa balistike të çdo rrezeje, të cilat,  në varësi të dizajnit të tyre, mund të pajisen edhe me një kokë bërthamore.

Japonia ka kërkuar tashmë një takim urgjent të Këshillit të Sigurimit të OKB-së lidhur me lëshimet. SHBA-ja nuk arriti të siguronte një rezolutë që përcaktonte sanksione më të ashpra ndërkombëtare për Korenë e Veriut përmes Këshillit të Sigurimit majin e kaluar, për shkak të vetos nga Rusia dhe Kina. Thomas-Greenfield tha se shkelja e vazhdueshme e Phenianit të rezolutës së Këshillit të Sigurimit kërkon një përgjigje.

“Ne jemi të ngarkuar për ruajtjen e paqes dhe sigurisë ndërkombëtare”, tha ajo.

Pheniani ka akuzuar vazhdimisht Uashingtonin se ka ndihmuar fqinjin e tij për t’u përgatitur për një sulm, një pretendim që SHBA dhe Koreja e Jugut e hedhin poshtë.

SI.E./KT/Shqiptarja.com

TAG:
• OKB
• Koreja e veriut
• SHBA