SHBA përsërit apelin kundër
bojkotit të PD: Hyni në zgjedhje

Tre ditë pas deklaratës së ambasadës amerikane në Tiranë të cilët sqaruan se SHBA nuk mbështet bojkotin e Partisë Demokratike, një tjetër zyrtar i lartë i DASH, Zv/ndihmës Sekretari Amerikan i Shtetit, Hoyt Brian Yee, përsërit të njëjtin apel.
 
Yee ka folur nga Prishtina ku po zhvillon një vizitë zyrtare.
 
"Zgjedhjet parlamentare në Shqipëri, më 18 qershor"
Gjatë një interviste për RTK-në zyrtari i DASH, duke komentuar zgjedhjet në Shqipëri, ka thënë se zgjedhjet duhet të mbahen në 18 qershor dhe i gjithë faktori politik duhet të bëhet pjesë i këtij procesi.  
 
“Shqipëria duhet që t’i mbajë zgjedhjet e saj në kohën e duhur, më 18 qershor”, ka thënë Yee.
 
“Dhe nëse ka probleme, ne mendojmë se opozita dhe qeveria duhet të ulen në dialog dhe t’i zgjidhin, në mënyrë që zgjedhjet të jenë të lira e të ndershme”, ka shtuar Yee. 

Fillimisht ishte ambasada amerikane në Tiranë që përgenjështroi Lulzim Bashën pas kthimit të tij nga vizita në SHBA, kur u shpreh se Uashingtoni mbështet opozitën.

Sipas ambasadës, SHBA nuk mbështet bojkotin e Kuvendit, pasi një lëvizje e tillë politike nuk favorizon ecurinë e reformave, kryesisht të Reformës në Drejtësi dhe zbatimin e Vettingut dhe procesin e integrimit të vendit në BE.   

Edhe CDU e Angela Merkel, një forcë politike kjo partnere me PD-në si dhe prezenca e OSBE-së në Tiranë, u pozicionuan haptazi kundër bojkotit të parlamentit dhe zgjedhjeve të 18 qershorit nga opozita. 

Përmes një letre të mbërritur në selinë e demokratëve, zëvendëskryetari i grupit të CDU-CSU në Parlamentin gjerman, Franz Josef Jung, i cili është njëkohësisht edhe shefi i politikës së jashtme në CDU, si dhe ministër i Mbrojtjes së Gjermanisë, i kërkoi Lulzim Bashës të heqë dorë nga rruga e bojkotit të zgjedhjeve.

Në letrën e Jung sqarohet se CDU pajtohet me shqetësimet e opozitës për shitblerjen e votës, por shton gjithashtu se bojkoti nuk është zgjidhje në një kohë kur Brukseli pret zbatimin e Reformës në Drejtësi. 

"Vonesa e reformës në drejtësi dhe bojkoti i zgjedhjeve nga opozita do ta kthenin Shqipërinë shumë mbrapa në rrugën e saj drejt BE-së. Dhe do të dëmtonte shumë marrëdhëniet mes PD-së dhe CDU/CSU-se" - thuhet në letrën e Jung drejtuar kryetarit të PD, Lulzim Basha. 

Ndërkohë, qëndrim të prerë kundër bojkotit të paralajmëruar nga PD për zgjedhjet e 18 qershorit ka mbajtur edhe ambasadori i OSBE-së në vendin tonë, Bernd Borchardt. Përmes një deklarate për mediat, kreu i Prezencës u shpreh se bojkoti është papërgjegjshmëri politike dhe se një sjellje e tillë e kthen Shqipërinë 20 vite pas në kohë. 

TAG:
• OSBE