TIRANË- Departamenti Amerikan i Shtetit ka shpallur "non grata" rreth 80 ish-zyrtarë dhe zyrtarë të lartë, në mbarë botën për shkak të korrupsionit. Ka qenë vetë Ambasada Amerikane në Tiranë që ka bërë me dije njoftimin, e ndërsa pjesë e listës janë edhe nga Ballkani Perëndimor.  

"Departamenti i Thesarit përcaktoi dhjetëra individë dhe subjekte për përfshirjen e tyre në korrupsion, përfshirë zyrtarë të tanishëm ose të mëparshëm në Amerikën Qendrore, Afrikë, Ballkanin Perëndimor dhe Europën Lindore. Më tej, Departamenti i Shtetit vendosi publikisht kufizime vizash për mbi 80 zyrtarë të huaj të mëparshëm apo të tanishëm dhe anëtarët e ngushtë të familjes, çka si rregull i skualifikon për të hyrë në SHBA për shkak të korrupsionit domethënës, si dhe të tjerë sipas Aktit të Angazhimit të Përmirësuar të Trekëndëshit të Veriut-Shtetet e Bashkuara. Për të zgjeruar ndikimin e këtyre mjeteve, ne u bashkërenduam me partnerë të huaj përmes nismave të tilla si ajo për Demokracitë kundër Strehave të Sigurta (DASH) dhe këshilluam qeveritë e huaja për miratimin e mekanizmave të ngjashëm”, shkruhet në njoftimin e ambasadës Amerikane, referuar vendimit të DASH.

Më 6 dhjetor 2021, Presidenti Joe Biden nxori Strategjinë e parë të  Shteteve të Bashkuara për Kundër Korrupsionit  për të përballuar kërcënimin e rëndë që paraqet korrupsioni për sigurinë kombëtare të SHBA. E organizuar në pesë shtylla, Strategjia përcakton linja specifike të punës për të mbështetur njerëzit dhe institucionet që luftojnë korrupsionin, veprimet e drejtpërdrejta kundër aktorëve të korruptuar dhe pengojnë abuzimin e aktorëve të korruptuar ndaj sistemit të SHBA financiar. Kujtojmë se për këtë motiv, “korrupsion” dhe “minim të demokracisë” është shpallur në Shqipëri ‘Non Grata” dhe ish kryeministri Sali Berisha.