SHBA, vrau 18 mace, gjykata e
dënon me 16 vite burg

Një gjykatë në Santa Clara të Kalifornisë dënoi me 16 vjet burg vrasësin e maceve, Robert Farmer, 26 vjeç.

Kafshët e zhdukura i përkisnin zonës përreth parkut të Kambrianit në San Jose. Disa prej maceve të gjetura ishin torturuar nga Farmeri, dy prej tyre u gjetën në një kosh mbeturinash. Një nga macet e zbuluara u ekzaminua se ishte dhunuar seksualisht.

I dënuari u arrestua në tetor të vitit 2015 gjatë kohës që po flinte gjumë me një nga macet e vrara në makinën e tij.

Gjatë seancës gjyqësore, ai pranoi akuzat e kryerjeve të krimeve mizore ndaj 21 maceve: 18 prej tyre i kishte vrarë dhe 3 të tjera i kishte lënduar.

Në letrën e shkruar nga Farmeri, e cila u lexua në gjyq nga avokati i tij citohej: “Duket sikur një njeri tjetër i ka kryer këto krime, por e di që ai jam unë. Është kaq e vështirë të pranoj se i kam bërë ato krime. Unë u kam rrëmbyer një pjesëtar të këtyre familjeve. Fakti që kam qenë jashtë kontrollit nuk përbën justifikim”.

Zv-prokurorja e Distriktit të Kontesë së Santa Klarës Aleksandra Elis e hodhi poshtë letrën e Robert Farmerit duke e konsideruar veprimin e tij një përpjekje për të fituar mëshirë.
“Gjykatësja miratoi analizën time. Ajo e dënoi me 16 vjet burg. Shpresojmë që kjo kohë të jetë sa më e gjatë”, tha Elis.

Robert Farmerit iu ndalua të mbante apo të kujdesej për një kafshë shtëpiake për një periudhe 10 vjet pasi të lirohej nga burgu si dhe detyrohet të qëndrojë larg parkut të Kambrianit.

D.V/Shqiptarja.com