Një 59-vjeçar ka rënë në prangat e policisë pasi ka qëlluar me kosore një person. Sherri mes tyre ka nisur në një lokal në qendër të Bushatit.

59-vjeçari ka qëlluar disa herë me kosore një 39-vjeçar, i cili ka mbetur i dëmtuar në kokë dhe në pjesë të ndryshme të trupit, is edhe ka pësuar thyerje në krahun e djathtë. Ai ndodhet në spital, por jashtë rrezikut për jetën.

“Shërbimet e Komisariatit të Policisë Vau i Dejës, ditën e djeshme, pas marrjes së njoftimit se në ambientet e një lokali, në qendër të Bushatit ka pasur një konflikt për motive të dobëta, ku shtetasi B. Sh. kishte goditur me mjet prerës (kosore) një shtetas, kanë organizuar menjëherë punën për kapjen e autorit, si dhe për sqarimin e rrethanave.

Si rezultat i veprimeve të shpejta operacionale, u bë i mundur arrestimi në flagrancë i shtetasit B. Sh., 56 vjeç, banues në fshatin Mali i Jushit.

Nga veprimet hetimore, dyshohet se shtetasi P. V., 39 vjeç, është dëmtuar në kokë dhe në pjesë të ndryshme të trupit dhe ka pësuar frakturë (thyerje) në krahun e djathtë, pasi është goditur me mjet prerës (kosore) nga shtetasi B. Sh., gjatë një konflikti për motive të dobëta. Mjeti prerës (kosore) u sekuestrua në cilësinë e provës materiale”, njoftoi Policia.

Materialet procedurale i kaluan Prokurorisë, për veprime të mëtejshme.