Shirat e rrëmbyeshëm shkaktojnë
viktima të shumta në Japoni e Kinë

Mijëra njerëz në Japoninë e jugut vazhdojnë të mbeten të izoluar si pasojë e përmbytjeve dhe rrëshqitjeve të tokës që kanë shkaktuar deri tani të paktën 26 viktima. Ushtria japoneze ka dërguar ndihma me helikopterë në zonat e izoluara. Shumica e viktimave nga koha e keqe kanë qenë të moshuar, 70 dhe 80-vjeçarë. Shërbimet meteorologjike thanë se më e keqja tashmë ka kaluar, megjithëse edhe sot priten shira në disa rajone.

Ndërkaq edhe Kina është përfshirë nga stuhi të rrëmbyeshme shiu duke nisur nga e diela, me pasojë përmbytje dhe ndërprerje të transporteve. Në provincën Hunan shira të rrëmbyeshëm kanë zgjatur për 8 orë duke arritur në 213 mm.

Mbi 100.000 banorë në 15 qytete janë detyruar të zhvendosen.

Më shumë se 20 shtëpi u shkatërruan si pasojë e rrëshqitjeve të tokës dhe 1500 hektarë tokë e punuar u dëmtua, me një kosto ekonomike që shkon në 152 milionë yuan.

Shumë nënkalime në akse kryesore u përmbytën duke ngadalësuar ose bllokuar trafikun.

Meteorologët parashikojnë tre ditë me shira të rrëmbyeshëm në rajonet jugore dhe vendi pret të përballet me dëme të tjera.

(mk/shqiptarja.com)