Shkarkimet, debate në Këshill
Basha: Performancë e dobët

TIRANË – Largimet nga puna që prej majit 2011 në administratën e bashkisë së Tiranës janë bërë mollë sherri mes këshilltarëve socialistë dhe kryebashkiakut Lulzim Basha. Bazuar në materialet e publikuar edhe në gazetën Shqiptarja.com, kreu i këshilltarëve socialistë, Aldrin Dalipi deklaroi se ajo që po ndodh është e pafalshme.
“S’ka ndodhur kurrë që brenda 6 muajve, të largohen nga puna 350 vetë. Dhe mbi të gjitha, pa asnjë motivacion”, tha Dalipi sot në mbrëmje.
Këto largime, kryetari i bashkisë së Tiranës, Lulzim Basha i ka justifikuar me punën e dobët që, sipas tij bënin këta punonjës në shërbim të qytetarëve.
“ Ndryshe nga ju, që bashkinë e shikoni si pronë tuajën, ne e kemin kthyer atë në shërbim të qytetarëve të Tiranës. Ndaj dhe kriteri i vetëm i punës këtu është ky shërbim. Shkarkimet nga puna janë bërë në bazë të ligjit dhe performancës së tyre në shërbim të qytetarëve’, tha kryebashkiaku.

UJËSJELLËSI
Kryebashkiaku Lulzim Basha i ka propozuar Këshillit marrjen në pronësi nga Bashkia e Tiranës të aksioneve të saj të Ujësjellës - Kanalizimeve sh.a, Tiranë.
Edhe lidhur me këtë kërkesë ka patur debate mes këshilltarit të majtë Aldrin Dalipi dhe kryebashkiakut, Lulzim Basha. Dalipi ka ngritur problemin e faturave të ujit dhe energjisë ku shumë qytetarë ankohen se faturohen më shumë sec paguajnë, duke i kërkuar kryebashkiakut transparencë në këtë proces.
“Me thënë të drejtën kam takuar shumë qytetarë të ndëshkuar, të papunë e invalidë të cilët ishin faturuar më shumë se sa kanë paguar... Ju zoti Basha keni ngritur zërin për cmimin e portokalleve, por jo për faturat që ju shkojnë qytetarëve në shtëpi. Një administratë e përgjegjshme do nxirrte përgjegjës, madje do vinte edhe njerëz para drejtësisë”, ka deklaruar ai.
Kryebashkiaku Basha i ka cilësuar akuzat e Dalipit demagogji.
"Brenda datës 5 mars të gjitha familjet e faturuara më tepër nga ujësjellësi do faturohen më pak në muajin pasardhës, pra do t’ju zbritet shuma e paguar më tepër në muajin paraardhës. Për problemet imagjinare të mos harxhojmë kohën, pasi asnjë intrigë politike nuk do ta zhbëjë vendosmërinë time”, tha Basha.

(aq/shqiptarja.com)