Shkodër, policia i kap në makinë me armë e drogë, 2 të arrestuar

Shkoder- Dy persona, një 18 dhe një 23 vjeçar u arrestuan sot në Shkodër pasi po qarkullonin me makinë nëpër qytet, me armë zjarri pistoletë dhe me lëndë narkotike.

Policia ndaloi për kontroll automjetin tip “Audi” në rrugën “Ethem Osmani”, me të cilin qarkullonin shtetasit Rikardo Veshi dhe Nikson Kodra

“Gjatë kontrollit në këtë automjet dhe kontrollit fizik ndaj këtyre shtetasve, shërbimet e Policisë kanë gjetur 1 armë zjarri pistoletë që dyshohet se e posedonte shtetasi R. V. dhe një sasi lënde të dyshuar narkotike kanabis që dyshohet se e posedonte shtetasi N. K”  informoi sot policia e Shkodrës.

LEXO EDHE:
Tritol pranë biznesit të kryetarit të Rithemelimit në Malësi të Madhe, u dëmtua reklama e hotelit! Sterkaj: Shpërthimi jo në pronën time, por në parking

Nikson Kodra 23-vjeçari, i dyshuar si posedues i lëndës narkotike që u gjet në automjet, rezulton me precedent të mëparshëm penal në fushën e narkotikëve.   

Arma e zjarrit pistoletë dhe lënda narkotike u sekuestruan në cilësinë e provës materiale, bashkë me automjetin në pronësi të Kodrës dhe 2 celularë.  

Arrestimi i 18 vjeçarit Rikardo Veshi, banues në Vaun e Dejës dhe Nikson Kodrës banues në Shkodër u bë në kuadër të operacionit të koduar “Sundimi i ligjit”

S.G/KT/Shqiptarja.com

TAG:
• Shkoder