Shkodër/ Zbulohet një ‘shtëpi bari’ në fshatin Trush, gjenden 123 bimë narkotike! Në pranga tre familjarët! Brenda banesave u gjenden armë e një Jet Ski (EMRAT)

SHKODËR- Një banesë e pabanuar e përshtatur për kultivimin e lëndëve narkotike me anë të llambave është zbuluar në fshatin Trush i Poshtëm në Shkodër. Në pjesën hyrëse të banesës dhe në katër dhomat e saj u gjetën dhjetëra bimë narkotike të kultivuara në vazo, me anë të llambave elektrike. 

Policia thotë se në momentin e ndërhyrjes, në banesën e përshtatur si laborator, u kap në flagrancë duke u kujdesuar për bimët narkotike, shtetasi Lorenc Trieshi, 34 vjeç, banues në Fushë Kuqe, Kurbin.   

Si autorë të dyshuar të kultivimit të kanabisit janë arrestuar Dedë Laca, 64 vjeç dhe djali i tij Anton Laca, 36 vjeç. Nga hetimet rezulton Lorenc Trieshi, është nipi i shtetasit Dedë Laca.

Gjatë kontrollit të banesës u konstatua se kishte lidhje të paligjshme të energjisë elektrike, që shërbente për furnizimin e pajisjeve elektrike që përdoreshin për kultivimin e bimëve narkotike.   

Në cilësinë e provës materiale u sekuestruan 82 llamba dhe aparate të ndryshme elektrike, 5 aspiratorë, si dhe u morën për ekspertim 123 bimë narkotike që ishin kultivuar në vazo.   

Sipas bluve të Shkodrës, nga kontrolli përreth banesës, në një ambient tjetër të përshtatur për tharjen e bimëve narkotike, u gjetën 2 mjete lundruese tip “Jet Ski”, pa dokumentacion.    

Në përfundim të hetimeve paraprake u bë arrestimi në flagrancë i këtyre 3 shtetasve, për veprat penale “Kultivimi i bimëve narkotike”, “Mbajtja pa leje dhe prodhimi i armëve, armëve shpërthyese dhe municionit” dhe “Vjedhja e energjisë elektrike”, të kryera në bashkëpunim.

Në vijim të operacionit, gjatë kontrollit të ushtruar në banesën e organizatorëve të kësaj veprimtarie kriminale, u gjetën dhe u sekuestruan në cilësinë e provës materiale, 1 armë zjarri kallashnikov me 2 karikatorë me fishekë, 1 armë gjahu sportive, 2 automjete, tip “Range Rover” dhe tip “Benz”, prodhime të viteve të fundit.  

Po ashtu është shoqëruar në ambientet e policisë, kryetari i fshatit Trush i Poshtëm, shtetasi K. D., 38 vjeç, lexuesi i matësve elektrikë në zonë, shtetasi Z. N., 26 vjeç, si dhe elektricisti i zonës, shtetasi F. H., 29 vjeç,  ndaj të cilëve u referuan materialet procedurale në Prokurori ku nisi procedimi në gjendje të lirë, për veprën penale “Shpërdorimi i detyrës”. 

Rendit zhvillimet sipas orarit:

Të Fundit Të Parat

M.Q./Shqiptarja.com

TAG:
• Shkoder
• Dedë Laca
• Anton Laca
• Lorenc Trieshi
• shtepi bari
• trush i poshtem