Gjykata Evropiane e të Drejtave të Njeriut (GJEDNJ) ka vendosur unanimisht se refuzimi i autoriteteve shqiptare për të pranuar një kandidat në Shkollën e Magjistraturës për trajnim si prokuror, për shkak të një dënimi penal të marrë kur ishte fëmijë, përbën shkelje të Nenit 8 të Konventës Evropiane të të Drejtave të Njeriut, që mbron të drejtën për respektimin e jetës private dhe familjare.

Rasti lidhet me Shiqiri Manjanin, një shtetas shqiptar 35-vjeçar nga Pogradeci, i cili në vitin 2006, në moshën 15-vjeçare, u dënua për vjedhje me 8 muaj burgim. Gjykata e asaj kohe mori parasysh moshën e tij të mitur, rrezikun e ulët shoqëror dhe kthimin e pronës së vjedhur, duke pezulluar dënimin për tre vjet.

Në vitin 2017, Manjani u rehabilitua ligjërisht dhe vazhdoi karrierën si avokat në sektorin privat, më pas si oficer policie gjyqësore në një prokurori që nga viti 2019.

Në shkurt 2020, Manjani aplikoi për programin tre-vjeçar të trajnimit si prokuror në Shkollën e Magjistraturës. Ai deklaroi dënimin e tij dhe kaloi provimet hyrëse, por në dhjetor të po atij viti, Këshilli i Lartë i Prokurorisë (KLP) e refuzoi pranimin e tij, duke u bazuar në legjislacionin shqiptar që ndalon personat me dënime penale të hyjnë në sistemin e drejtësisë, pavarësisht rehabilitimit. Apelimet e tij në Gjykatën e Lartë dhe Gjykatën Kushtetuese u hodhën poshtë, duke argumentuar se qëllimi ishte ruajtja e integritetit të magjistratëve.

Në vendimin e sotëm, GJEDNJ theksoi se refuzimi nuk lidhej me mungesë kualifikimesh profesionale,  Manjani kishte kaluar provimet dhe kishte përvojë si jurist, por vetëm me dënimin e vjetër si minor.

Gjykata kritikoi autoritetet shqiptare për moskryerjen e një vlerësimi individual të rastit, duke mos marrë parasysh moshën e mitur të tij në kohën e veprës, natyrën jo të dhunshme dhe impulsive të saj, kohën e kaluar që nga dënimi (14 vjet), sjelljen e tij të mirë pasuese dhe rehabilitimin ligjor. Sipas GJEDNJ, ndalimi absolut dhe i përhershëm ishte joproporcional dhe nuk respektonte parimet e drejtësisë për minorët, siç parashikohen në Konventën e OKB-së për të Drejtat e Fëmijës dhe Kodin Penal Shqiptar për Minorët.

"Autoritetet shqiptare trajtuan të miturin si të rritur, duke injoruar interesin më të mirë të fëmijës dhe qëllimin e rehabilitimit për riintegrim në shoqëri," thuhet në vendim. Gjykata shtoi se ndalimi ndikoi seriozisht në zhvillimin profesional dhe jetën private të Manjanit në një fazë të hershme të karrierës së tij.

Si pasojë, Shqipëria është urdhëruar të paguajë 4,500 euro dëmshpërblim jomaterial për Manjanin.

Vendimi i Gjykatës Evropiane për të Drejtat e Njeriut

Vendimi i Gjykatës Evropiane për të Drejtat e Njeriut