Shkozet, bombë-celular
në një pikë karburanti

SHKOZET, Durrës – Rreth orës 12 e 40 minuta në sheshin e një pike karburanti nga punonjësit e pompës së furnizimit është konstatuar një pako e mbështjellë me natriban brenda së cilës ishte dhe një telefon i markës “Nokia” si dhe një material tjetër për të cilin është dyshuar se mund te jetë tritol, ose nje minë artizanale siç njihet në terminologjinë e kriminalistikës.

Kjo ngjarje ka ndodhur në afërsi të karburantit në lagjen 14 të Shkozetit, në Durrës. Menjëherë pas sinjalizimit nga punëtorët e karburantit është lajmëuar policia e cila nga të dhënat e para ka njoftuar se dyshohet se bëhet fjalë për një celular-bombë të prodhuar nga xhenjerë amatorë.

Policia ka shkuar menjëherë në vendngjarje dhe ka rrethuar zonën. Ajo ka larguar në një rreze të gjerë njerëzit dhe mjetet për të shmangur çdo rrezik të mundshëm nga një shpërthimi i kësaj pajisjeje. Për të bërë çaktivizimin e saj është njoftuar RENEA.

Sipas ekspertëve të policisë në vendngjarje, mina artizanale përbehej nga celulari tip Nokia, i cili ishte i mbështjellë me eksploziv, por fatmirësisht i pa aktivizuar.

Një ndër pistat e para të hetimit për vendosjen e celularit–bombë është edhe mundësia se objektive i sajë mund të ketë qenë ndonjë mjet të cilit ia kanë vendosur nën shasi dhe që mund të ketë rënë aksidentalisht, në momentin që mjeti mund të ketë qenë duke u furnizuar me karburant.

Specialistët kanë sqaruar se ky celular bombë ishte i lidhur me një fije me 2 kallëpe tritoli, i pa aktivizuar, ndërkohë që dhe mund të shpërthente nëse aktivizohej nga një celular tjetër.

(ma.br/shqiptarja.com)