DURRËS- Një rast i paprecedentë është regjistruar në qytetin e Durrësit, ku statuja e këngëtares së njohur, Tina Turner në shëtitoren ‘Taulantia’ në Durrës është shkulur. Kjo statujë, ishte vendosur së bashku me John Lennon, Mick Jagger dhe Bob Dylan për të dhënë idenë e lirisë te të rinjtë e viteve '80 e cila kulmoi me eksodin e famshëm në drejtim të vendeve perëndimore, por sot i kanë mbetur vetëm këpucët.

Report Tv sjell foto teksa shihet që në mesin e “shoqeve dhe shokëve” prej bronzi që zbukuronin shtëtitoren, aty mungon  mbretëresha e “Rock 'n' Roll". Sesi është bërë e mundur shkulja e kësaj statuje ende është e paqartë, teksa pritet një reagim nga ana e autoriteteve.

Kjo statujë si edhe të 3 yjeve të tjerë të viteve '80 janë vepra të autorëve Qazim Kërtusha, Ilmi Kasemi, Arben Pajo dhe Dylber Neziri. Qytetarë e pushues, jo vetëm që i soditin këto skulptura, por edhe pozojnë me to pasi  janë me gjatësinë e një shtati njeriu dhe krijojnë afrimitet sepse janë të vendosura direkt në shesh e jo në platforma apo piedestale të larta sikurse ngjet rëndom.