Në ditën e genocidit grek ndaj shqiptarëve të Çamërisë, Shoqata Çamëria i ka bërë kërkesë Këshillit të Ministrave që ti japë statusin “Varrezë Monumentale e Shqiptarëve të Çamërisë”, varrezave të Kllogjerit në Konispol.
Në këtë vend ndodhen eshtrat e më shumë se 2900 shqiptarëve të Çamërisë, të cilët 74 vite më parë, u larguan me dhunë nga trojet e tyre në Çamëri.
Shoqata “Çamëria” është shoqata e parë pluraliste e themeluar në janar të vitit 1991, si përfaqësuesja e vetme legjitime e të gjithë shqiptarëve të Çamërisë, pavarësisht bindjeve politike të tyre.
Ajo është krijuar për mbajtjen gjallë të çështjes çame, forcimin e ndjenjës së përkatësisë e bashkësisë mes vetë shqiptarëve të Çamërisë dhe kombit shqiptar pas dëbimit në genocidin e ushtruar nga forcat parashtetërore dhe shtetërore greke.
Shoqata “Çamëria” me ndihmën e qeverisë shqiptare ka ndërtuar Varrezat Monumentale të Shqiptarëve të Çamërisë në fshatin Kllogjer të Sarandës, për të përkujtuar mbi tre mijë shqiptarë të Çamërisë që humbën jetën nga genocidi i shovinizmit grek, me datë kulmore përkujtimore datën 27 qershor. Kjo datë është shpallur ditë përkujtimore nga Kuvendi i
Shqipërisë, me anë të ligjit nr. 7893, datë 30.6.1994 “Për shpalljen e 27 qershorit në kalendarin kombëtar "Dita e genocidit ndaj shqiptarëve të Çamërisë nga shovinizmi grek”; dhe ngritjen e një memoriali në Konispol”.
Neni 2 pika 7, e ligjit nr. nr.9220, datë 15.4.2004 “për administrimin e shërbimit të varrimit”, të ndryshuar, përcakton se “Varrezë monumentale” është varreza ku prehen personalitete historike, fetare, kulturore, dëshmorë të kombit a njerëz të shquar dhe që mbahet për qëllime historike, përkujtimore, nderimi a vetëdijësimi kombëtar”.
Bazuar në nenin 3, pika c, e ligjit të sipërpërmendur; ligjit nr. 7893, datë 30.6.1994 “Për shpalljen e 27 qershorit në kalendarin kombëtar”;
Dita e genocidit ndaj shqiptarëve të Çamërisë nga shovinizmi grek”; dhe ngritjen e një memoriali në Konispol”; ndihmës së dhënë nga qeveriashqiptare për ndërtimin e Varrezave Monumentale të Shqiptarëve të Çamërisë në fshatin Kllogjer të Sarandës, si vendprehja përfundimtare e dëshmorëve që dhanë jetën vetëm pse ishin shqiptarë; me qëllim historik e përkujtimor ndaj viktimave të genocidit, nderimit të dëshmorëve të genocidit dhe vetëdijësimit kombëtar, kërkojmë:
Hartimin dhe miratimin e Vendimit të Këshillit të Ministrave “Për dhënien e statusit “Varrezë Monumentale e Shqiptarëve të Çamërisë” të vendprehjes së shqiptarëve të Çamërisë të rënë gjatë Luftës së Dytë Botërore, me vendndodhje në fshatin Kllogjer, Bashkia Konispol”.
Duke ju falenderuar për bashkëpunimin.
Shoqata "Çamëria"
