Në Gjermani, koalicioni qeverisës i Kancelarit Olaf Scholz u shpërbë sot pas shkarkimit të ministrit të financave dhe dorëheqjeve të tre ministrave të tjerë të mërkurën mbrëma nga radhët e partisë “Demokratët e Lirë”, një parti me orientim biznesi. Kancelari Scholz do të udhëheqë vendin me një qeveri pakice të social-demokratëve në koalicon me Partinë e Gjelbërt, ndërkohë që tha se do të kërkojë votëbesimin në parlament më 15 janar, gjë që mund të çojë në zgjedhje të parakohshme në muajin mars. Opozita gjermane e kundërshtoi një plan të tillë.
Kryeministri gjerman Olaf Scholz do të qeverisë me një qeveri të pakicës pas vendimit dramatik për të shkarkuar ministrin e financave Christian Lindner. Ai tha se Gjermanisë i duhet qartësi për rrugën e saj politike për të ardhmen.
“Shumë shpesh kompromiset e nevojshme ishin viktimë e përleshjeve teatrale dhe kërkesave të zhurmshme ideologjike. Shumë shpesh, Ministri Lindner bllokoi ligjet në forma të pakuptimta. Shumë shpesh ai u angazhua në taktika të ulta partiake. Shumë shpesh ai shkeli besimin tim. Ai u tërhoq në mënyrë të njëanshme nga marrëveshja për buxhetin pasi kishim rënë dakord pas negociatave të gjata. Nuk ka bazë besimi për bashkëpunim të mëtejshëm. Puna e qeverisë është e pamundur në këtë formë”, deklaroi kancelari Scholz.
Kancelari Scholz tha se do ta paraqesë një mocionin për votë besim në parlamentin gjerman më 15 janar, në mënyrë që ligjvënësit të vendosin nëse Gjermania duhet të mbajë zgjedhje të parakohshme në fund të marsit. Zgjedhjet në Gjermani ishin të parashikuar të mbaheshin në shtator.
Ministri i shkarkuar Lindner e akuzoi kancelarin Scholz për qeverisje, siç tha ai, pa ambicje. Zoti Linder ka kundërshtuar rritjen e taksave, apo rritjen e borxhit publik të Gjermanisë.
“Olaf Scholz ka dështuar prej kohe të kuptojë nevojën për një ringjallje ekonomike në vendin tonë. Ai prej kohe nuk po u kushton rëndësi shqetësimet ekonomike të shtetasve tanë… Propozimet e tij janë boshe, pa ambicje dhe nuk i kontribuojnë tejkalimit të pengesave për rritjen ekonomike të vendit tonë”, deklaroi ai.
Pas shkarkimit të Ministrit Lindner, tre ministra të tjerë të partisë së tij dhanë dorëheqje nga qeveria, duke rrëzuar koalicionin qeverisës. Por të enjten në mëngjes, Ministri i Transportit Volker Wissing tërhoqi papritmas dorëheqjen, duke thënë se ka vendosur të qëndrojë në qeverinë e zotit Scholz dhe braktisi partinë e tij.
Ndërkohë drejtuesi i Bashkimit Demokristian, Friedrich Merz, partisë më të madhe opozitare të qendrës së djathtë, e kundërshtoi planin e kancelarit Scholz për të pritur deri në janar për votëbesimin e qeverisë së tij. Ai tha se koalicioni nuk e ka shumicën në parlamentin gjerman dhe bëri thirrje për një mocion në fillim të javës së ardhshme.
“Kemi një numër angazhimesh ndërkombëtare dhe vendimesh në Bashkimin Evropian për të cilat na duhet një qeveri që është e aftë të veprojë. Nuk mund të kemi një qeveri që nuk gëzon shumicën për disa muaj, pastaj një fushatë zgjedhore për disa muaj të tjerë dhe pastaj javë të tëra negociatash për koalicionin. Na duhet të nxitojmë”, tha ai.
Si pjesë të orientimit të tyre, social-demokratët e qendrës së majtë të Kancelarit Scholz dhe Partia e Gjelbërt , e cila është pjesë e koalicionit qeverisës, propozojnë investime të mëdha shtetërore në ekonomi dhe kundërshtojnë propozimet e partisë Demokratët e Lirë për të shkurtuar programet e mirëqenies sociale./ VOA
Lajme të tjera
-
Dramë në 'Allianz', tifozi i Bayern Munich ndërron jetë gjatë ndeshjes së Champions League
7 Nëntor, 10:01 -
Qeveria gjermane në prag të kolapsit! Scholz shkarkon ministrin e Financave, koalicioni qeverisës buzë dështimit! Në janar kancelari paraqet kërkesën për votëbesim në Bundestag
6 Nëntor, 22:24 -
E rëndë në Gjermani, shqiptari vret ish-gruan në sy të tre fëmijëve të mitur
6 Nëntor, 17:31 -
Kërkohej në gjithë Europën si pjesë e bandës së ‘skifterëve’, shqiptari arrestohet sapo vë këmbë në aeroportin e Veronës! Udhëtoi nga Tirana, do ekstradohet drejt Gjermanisë
6 Nëntor, 17:01 -
Zjarret në aeroplanët e transportit të mallrave, dyshohet se u organizuan nga Moska
5 Nëntor, 22:12 -
I shpallur në kërkim nga Gjermania, arrestohet në Itali 31-vjeçari shqiptar
5 Nëntor, 13:24 -
Gjermani/ I riu shqiptar vetëvritet në banesë! Babai apel për ndihmë për kthimin e trupit në atdhe: Pronari nuk i jepte pagesën
3 Nëntor, 07:19
-
Izraelitët aplikojnë për pasaportë gjermane
2 Nëntor, 22:24 -
Do të ketë zgjedhje të parakohshme në Gjermani?
2 Nëntor, 19:31 -
Pse ka nevojë Europa për Shqipërinë? Shkrimtari austriak: Kryeministri Rama, interesant në politikën europiane! I vetmi kryetar shteti, artist
2 Nëntor, 10:12 -
Volkswagen do të mbyllë tre fabrika në Gjermani, pritet shkarkimi nga puna i mijëra punonjësve
28 Tetor, 17:57 -
Alarmi i Ali Ahmetit: Po rrezikohen arritjet historike të shqiptarëve në Maqedoninë e Veriut! Letër Ramës, Begajt, Kurtit, Osmanit e liderëve botërorë
27 Tetor, 19:00
