Shprehu mbështetje për pengjet në Gaza, Turqia arreston futbollistin izraelit

Autoritetet turke arrestuan futbollistin izraelit, Sagiv Jehezkel, lojtar i klubit të futbollit, Antalyaspor. Sipas tyre, ai do të merret në pyetje pasi gjatë një ndeshjeje në ligën turke shfaqi solidaritetin me njerëzit që po mbahen pengje nga Hamasi, grupi palestinez i shpallur organizatë terroriste nga Shtetet e Bashkuara të Amerikës dhe Bashkimi Europian.

Sipas mediave turke, Jehezkel thuhet se u arrestua nga policia për hetim teksa po përgatitej të largohej nga Turqia të dielën mbrëma.

Ministri i Drejtësisë, Yilmaz Tunc, tha se ky shtetas po hetohet lidhur me dyshimet për “nxitje të hapur publike për urrejtje dhe armiqësi”. Përmes një postimi në X (ish-Twitter), Tunc tha se “Jehezkel ishte përfshirë në një gjest të shëmtuar, në mbështetje të masakrës izraelite në Gaza”.

Pasi shënoi golin e barazimit kundër klubit Trabzonspor, futbollisti shfaqi një fashë të lidhur në kyçin e dorës ku shkruhej se janë bërë 100 ditë që kur pengjet u rrëmbyen më 7 tetor, raportojnë mediat e huaja.

Ky gjest u vlerësua si provokues në Turqi, vend ku ka një kundërshtim të madh të hapur ndaj veprimeve ushtarake të Izraelit në Gaza dhe ku gjithashtu ka një mbështetje të madhe për palestinezët.

Ai është pezulluar nga ekipi dhe Ministri njoftoi se po bisedohet me avokatët e klubit për të shkëputur kontratën me futbollistin izraelit. Arrestimi i Jehezkelit ka nxitur zemërim në Izrael.

"Turp për Qeverinë turke", shkroi në X (ish-Twitter), ish-kryeministri izraelit, Naftali Bennet.

S.S/Shqiptarja.com

TAG:
• sulmohet izraeli
• turqi
• Sagiv Jehezkel