Shqipëria shkon në zgjedhje me
liderin e PS përpara në sondazhe

SPANJE- Shqipëria ndodhet sot në heshtje elektorale, përpara zgjedhjeve parlamentare të së dielës, në të cilat kandidati i opozitës Edi Rama shkon si i favorizuar nga anketimet drejt postit të kryeministrit. Agjencia më e rëndësishme spanjolle e lajmeve "EFE" i ka kushtuar vëmendje edhe procesit zgjedhor në Shqipëri.

Duke iu referuar situatës parazgjedhore në Shqipëri, në artikullin e publikuar nga "EFE" thuhet se "Partitë politike u dhanë fund mitingjeve të tyre të premten, në përfundim të një fushate të fuqishme elektorale, në një vend që deri tani asnjëherë nuk e ka prerë nyjen gordiane të mospranimit nga pala humbëse të rezultateve të zgjedhjeve".

Sipas sondazheve, 51 për qind të votave duhet të shkojnë në favor të socialistëve të Ramës, përballë 45 për qind të forcave konservatore të kryeministrit Berisha, por sistemi i ndarjes së votave në Shqipëri është i ndërlikuar dhe jo gjithnjë përputhet me vendet që do të marrin partitë në Kuvend, ku zgjidhen 140 deputetë. Probleme edhe këtë herë kanë mbetur parregullsi me listat e zgjedhësve, lehtësia e falsifikimit të kartave të identitetit, presionet ndaj nëpunësve të administratës, mundësitë e blerjes së votave dhe një përvojë negative gjatë proceseve të numërimit të votave. Po kështu, Komisioni Qendror i Zgjedhjeve ka vetëm katër nga shtatë anëtarë, pas tërheqjes së anëtarëve të zgjedhur nga forcat e opozitës.

Brukseli ka deklaruar se zhvillimi i zgjedhjeve të rregullta dhe të ndershme është kusht për avancimin e vendit drejt BE-së, ndërkohë që tri herë është rrëzuar kërkesa e tij për kandidim që nga viti 2009. Janë rreth 9.000 vëzhgues vendas dhe ndërkombëtarë, që do të monitorojnë procesin dhe 400 janë vetëm nga OSBE-ja.   
 
Redaksia Online
(e.s/shqiptarja.com)

TAG:
• OSBE