Shqipëria u hap dyert refugjatëve nga Ukraina, zbardhet vendimi i qeverisë: Mund të qëndrojnë pa leje deri në 1 vit

Shqipëria ka vendosur që të hapë dyert për refugjatët ukrainas, të cilët po largohen nga vendi i tyre pas pushtimit që po kryen Rusia në Ukrainë. Vendimi është marrë ditën e sotme në mbledhjen e qeverisë, ku është caktuar që shtetasit e Ukrainës kanë të drejtë të hyjnë dhe të qëndrojnë pa leje qëndrimi në Republikën e Shqipërisë për një afat deri në 1 (një) vit.

Vendimi i plotë

Përcaktimin e afatit të hyrjes dhe qëndrimit të shtetasve të Ukrainës në republikën e Shqipërisë

Në mbështetje të nenit 100 të Kushtetutës dhe të pikës 2, të nenit 29, të ligjit nr.79/2021, “Për të huajt”, me propozimin e ministrit të Brendshëm dhe të ministrit për Evropën dhe Punët e Jashtme, Këshilli i Ministrave

V E N D O S I:

1. Shtetasit e Ukrainës kanë të drejtë të hyjnë dhe të qëndrojnë pa leje qëndrimi në Republikën e Shqipërisë për një afat deri në 1 (një) vit.

2. Ngarkohen Ministria e Brendshme dhe Ministria për Evropën dhe Punët e Jashtme për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I EDI RAMA

M.Q./Shqiptarja.com

TAG:
• ministria e brendshme
• qeveria
• Rusi
• rusia sulmon ukrainen
• ukraine