Raporti i World Atlas/ Shqipëria, vendi i pestë më i varfër në Europë, ndikojnë çmimet e larta! Kosova në të dytin, evidentohet sfida e njohjes së kufizuar ndërkombëtare

Platforma World Atlas ka publikuar 10 vendet më të varfra në Evropë.

Sipas të dhënave për vitin 2025, Shqipëria është renditur si vendi i pestë më i varfër në Evropë, pas Bosnje e Hercegovinës.

Matja është bërë sipas barazisë së fuqisë blerëse. Renditja më poshtë përdor bazën e të dhënave World Economic Outlook të Fondit Monetar Ndërkombëtar (publikimi i tetorit 2025, me vlerësime për vitin 2025) dhe mat PBB-në për frymë mbi bazën e barazisë së fuqisë blerëse (PPP), e shprehur në dollarë ndërkombëtarë. PPP korrigjon ndryshimet në koston e jetesës midis vendeve dhe është standardi kryesor krahasues për analizën e nivelit të jetesës.

E shprehur thjesht, klasifikimi mat PBB në raport me koston e jetesës, pra çmimet e larta në Shqipëri janë faktor në rritjen e varfërisë.

“Shqipëria ka qenë një nga ekonomitë me performancën më të mirë në këtë listë gjatë viteve të fundit, me një rritje mesatare vjetore të PBB-së rreth 4% gjatë periudhës 2022–2025, e nxitur kryesisht nga bumi i turizmit. Vendi priti rreth 11.7 milionë vizitorë ndërkombëtarë në vitin 2024 (më shumë se katër herë popullsia e tij), ndërsa rritja u udhëhoq kryesisht nga turistët italianë dhe gjermanë.

Megjithatë, pavarësisht rritjes së turizmit, sfidat strukturore mbeten serioze: një popullsi që po plaket me shpejtësi, emigrimi në shkallë të gjerë i qytetarëve në moshë pune, aktiviteti i vazhdueshëm i sektorit informal dhe sundimi i dobët i ligjit vazhdojnë të ndikojnë negativisht në produktivitet. Shqipëria hapi negociatat për anëtarësim në BE në korrik 2022, ndërsa zyrtarët e BE-së e kanë përmendur vazhdimisht si një nga vendet kandidate më të avancuara për anëtarësim para vitit 2030”, thuhet në raport.

Kosova renditet si vendi i dytë më i varfër në Europë me 20,400 dollarë PBB për frymë.

“Kosova shpalli pavarësinë nga Serbia në vitin 2008 dhe mbetet shteti më i ri në Evropë. Ekonomia e saj është e vogël dhe e orientuar nga shërbimet, ku ndërtimtaria, tregtia me pakicë dhe reminitancat përbëjnë pjesën më të madhe të aktivitetit ekonomik të matur. Reminitancat nga diaspora kosovare (e përqendruar në Gjermani, Zvicër dhe Austri) arrijnë rregullisht rreth 15% të PBB-së, një nga raportet më të larta në botë.

Rritja reale e PBB-së ka qenë mesatarisht rreth 4% gjatë pesë viteve të fundit, por papunësia e të rinjve është afër 30% dhe një e treta e të rinjve kosovarë nuk janë as të punësuar dhe as të përfshirë në arsim apo trajnim. Njohja e kufizuar ndërkombëtare e Kosovës (rreth 100 shtete anëtare të OKB-së e njohin; Rusia, Kina, India, Spanja dhe Greqia janë ndër ato që nuk e njohin) kufizon qasjen në institucionet ndërkombëtare dhe ngadalëson investimet e huaja”, shpjegon raporti.

Sa i përket Serbisë, që renditet e teta, ndonëse përshkruhet si ekonomia më e madhe nga ish-republikat jugosllave në këtë listë dhe me bazën industriale më të zhvilluar mes tyre, një nga pengesat kryesore i përmendet normalizimi i marrëdhënieve me Kosovën.