Shtyhet seanca konstituive, serbët
kërkojnë konsultime me Beogradin

Kryesuesja e seancës konstituive të Kuvendit të Kosovës, Flora Brovina, ka thënë se mbajtja e kësaj seance është shtyrë për të enjten e ardhshme më 18 shtator. Ky vendim, pasoi takimin që Brovina zhvilloi me partitë politike, ku morën pjesë vetëm Partia Demokratike e Kosovës dhe komunitetet pakicë. Në këtë takim nuk kanë marrë pjesë edhe partitë e koalicionit, Lidhja Demokratike e Kosovës, Aleanca për Ardhmërinë e Kosovës, partia Nisma dhe Vetëvendosje.
 
Kërkesa për shtyrjen e seancës është parashtruar nga Lista Serbe. Më pas, Flora Brovina ka ftuar partitë politike në konsultime. Vendimi është marrë me anë të votave, ku koalicioni i gjerë nuk ka marrë pjesë.
 
Ndryshe, siç kanë njoftuar zyrtarë të partive politike në Prishtinë, Lista Serbe, e cila përfaqësohet me 9 deputetë në Kuvend, ka kërkuar konsultime shtesë me Beogradin pas, siç thuhet, zhvillimeve të reja politike që pasuan përfshirjen e Lëvizjes Vetëvendosje në koalicionin LDK, AAK dhe Nisma, ku bënte pjesë edhe Lista Serbe. 
 
Gjatë ditës,  presidentja e  Kosovës, Atifete Jahjaga, përsëri u ka bërë thirrje deputetëve të Kuvendit të Kosovës, që të gjejnë zgjidhje për ta tejkaluar ngërçin politik pa ndërhyrje nga jashtë.
Ajo ka theksuar se Kosova po hyn në një periudhë të rëndësishme dhe vendimtare dhe se deputetët e Kuvendit të Kosovës duhet të tregojnë pjekuri politike për tejkalimin e situatës.



Redaksia Online
(g.f/Shqiptarja.com)