‘Shumica e efektivëve në veri ishin pjesë e krimit’, Sveçla: Kosova s’gjunjëzohet nga banditët e mbështetur nga Serbia

Ministri i Brendshëm i Kosovës, Xhelal Sveçla ka deklaruar se shumica e zyrtaëve policorë në 4 komunat e veriut, në vend që t’ju shërbenin rendit dhe ligjit, ishin vetë pjesë e krimit e kontrabandës në rastin e Banjskës.

Ndërsa shkruan se qytetarët e Kosovës i  janë përgjigjur pozitivisht vendimit të qeverisë për regjistrimin e veturave nga targat ilegale në targa RKS, duke regjistruar 471 vetura për 4 ditë.

Reagimi i plotë:

Qytetarët tanë i janë përgjigjur pozitivisht vendimit të Qeverisë së Republikës së Kosovës për regjistrimin e veturave nga targat ilegale në targa RKS, duke regjistruar 471 vetura për 4 ditë.

Kjo pasi që sot në veri nuk janë më të plotfuqishëm kriminelët si Milan Radojçiç, Llune, Mami, Rusi e të ngjashëm.

Mund të duket e paimagjinueshme nga perspektiva e para një viti, por sot në 4 komunat e veriut shërbejnë zyrtarë policorë që janë në shërbim të rendit dhe ligjit e në luftim të kontrabandës, grupeve kriminale e terroriste.

Se shumica ishin vetë pjesë e krimit e kontrabandës tregon edhe përfshirja e ish-zyrtarëve policorë jo vetëm në rastin e Banjskës.

Shteti nuk gjunjëzohet nga banditët e as nga grupet kriminale edhe atëherë kur grupe të mirëorganizuara e mbështetura nga Qeveria e Serbisë synojnë terrorizimin e qytetarëve, cënimin e integritetit dhe sovranitetit të vendit tonë.

Ky rezultat është falë angazhimit të pandalshëm të secilit që nuk dorëzohet përballë kërcënimeve, shantazheve e sulmeve por besojnë në drejtësi e barazi

M.T/Shqiptarja.com

TAG:
• banjske
• kosova
• Xhelal Sveçla