Si po ia vështirëson Kina në heshtje jetën Rusisë

Kina po distancohet gjithmonë e më shumë nga Rusia dhe ekonomia e saj e rënduar nga sanksionet. Kujtojmë se një muaj më parë dy shtetet u shprehën se miqësia e tyre "nuk kishte kufij", por kjo ndodhi përpara se Rusia të niste luftën e saj në Ukrainë.

Tani, me ekonominë e goditur të Rusisë nga sanksionet pothuajse nga e gjithë bota, ka shumë gjasa se vullneti dhe gatishmëria e Kinës për të ndihmuar fqinjin e saj mund të jetë i kufizuar. Pekini ka refuzuar të dënojë sulmin e Rusisë ndaj Ukrainës, por nga ana tjetër dëshiron të shmangë ndikimin nga sanksionet që i ka denoncuar vazhdimisht si një mënyrë joefektive për zgjidhjen e krizës.

"Kina nuk është palë me krizën dhe nuk dëshiron që sanksionet të ndikojnë në Kinë," tha të martën ministri i Jashtëm Wang Yi gjatë një telefonate me homologun e tij spanjoll.

LEXO EDHE:
Bashkëpunëtori i Agresionit Ndaj Ukrainës i Nominuar për Çmimin Nobel në Paqe

Pekini gjithashtu dha konfirmimin e plotë të mërkurën për komentet e bëra në fillim të kësaj jave nga ambasadori i Kinës në Ukrainë.

"Kina nuk do ta sulmojë kurrë Ukrainën. Ne do të ndihmojmë, veçanërisht ekonomikisht," citohet të ketë thënë Fan Xianrong në një deklaratë për shtyp nga qeveria rajonale e Lviv.

Frika se kompanitë kineze mund të përballen me sanksione të SHBA-së për lidhjet me Rusinë, kanë kontribuar në një shitje epike të aksioneve kineze ditët e fundit. Kjo rënie u përmbys të mërkurën kur Pekini premtoi se do të ndiqte politika për të nxitur zhvillimin ekonomik dhe për të mbajtur tregjet financiare të qëndrueshme.

Zyrtarët amerikanë thanë për CNN këtë të hënë se kishin informacione se Kina ka shprehur mbështetje për Rusinë për ndihmën e kërkuar ushtarake dhe financiare, por Kina e hodhi poshtë këtë informacion si "dezinformim". Sipas analistëve thuhet se Kina po përpiqet të vendosë "një ekuilibër delikat" midis mbështetjes retorike të Rusisë, por pa antagonizuar më tej Shtetet e Bashkuara. Pekini dhe Moska ndajnë një interes strategjik për të sfiduar Perëndimin. Megjithatë, bankat kineze nuk mund të përballojnë të humbasin aksesin në dollarë amerikanë dhe shumë industri kineze nuk mund të përballojnë privimin nga teknologjia amerikane.

Kina është partneri tregtar numër 1 i Rusisë, por Pekini ka prioritete të tjera. Tregtia midis dy vendeve përbënte vetëm 2% tw tregtimit të Kinës pasi Bashkimi Evropian dhe Shtetet e Bashkuara kanë aksione shumë më të mëdha, sipas statistikave të doganave kineze të vitit të kaluar.

Masat që ka marrë Kina përkundrejt shmangies së pasojave që mund të ketë nga sanksionet për Rusinë, fillojmë që me dyfishimin e diapazonit të tregtimit të rublës. Monedha e Kinës, juani, nuk tregtohet plotësisht lirshëm, duke lëvizur brenda grupeve të përcaktuara nga zyrtarët në Bankën Popullore të Kinës (PBOC). Javën e kaluar, ata dyfishuan madhësinë e diapazonit të tregtimit të rublës, duke lejuar që monedha ruse të bjerë më shpejt. Rubla ka humbur tashmë më shumë se 20% të vlerës së saj ndaj dollarit dhe euros që nga fillimi i luftës në Ukrainë. Duke lejuar rënien e monedhës ruse kundrejt juanit, Pekini nuk po i bën asnjë favor Moskës. Rusët do të duhet të paguajnë më shumë në rubla për importet kineze si smartphone-t dhe makinat. Markat kineze të telefonave si Xiaomi dhe Huawei janë jashtëzakonisht të njohura në Rusi dhe ishin në garë me Apple ( AAPL ) dhe Samsung ( SSNLF ) për lidershipin e tregut përpara luftës.

Prodhuesit kinezë të makinave, si Great Wall Motor dhe Geely Auto, zënë 7% të tregut rus , duke shitur më shumë se 115.000 automjete vitin e kaluar. Great Wall Motor ka ndaluar furnizimin me makina të reja për tregtarët në Rusi për shkak të luhatjeve të kursit të këmbimit. Zgjerimi i brezit të tregtimit do t'i mundësonte juanit të vazhdonte me luhatjet e egra të rublës, në mënyrë që kompanitë kineze të mund "të kuptojnë më mirë madhësinë ose tendencën e luhatjeve të kursit të këmbimit në të ardhmen dhe të zvogëlojnë rreziqet e këmbimit duke përdorur metoda mbrojtëse, të tilla si derivatet", thuhet në deklaratë .

Një goditje tjetër që i bëhet Rusisë është nga rezervat. Ndihma më e rëndësishme që Kina mund t'i ofrojë Rusisë është përmes rezervave me vlerë 90 miliardë dollarë që Moska mban në juanë, shkroi Alicia García-Herrero, kryekonomiste për Azinë Paqësor në Natixis, në një raport kërkimor të martën. Sanksionet kanë ngrirë rreth 315 miliardë dollarë të rezervave të Rusisë ose afërsisht gjysmën e totalit, pasi vendet perëndimore kanë ndaluar marrëdhëniet me bankën qendrore ruse. Ministri rus i financave Anton Siluanov tha këtë javë se vendi donte të përdorte rezervat e juanit pasi Moskës iu bllokua aksesi në dollarë dhe euro, sipas medias shtetërore ruse. KBP-ja deri më tani nuk ka bërë asnjë koment për qëndrimin e saj në lidhje me këto rezerva.

Nëse Kina do të lejonte Moskën të konvertonte rezervat e saj të juanit në dollarë amerikanë ose euro, "kjo do të ndihmonte qartë ngërçin aktual të Rusisë," vuri në dukje García-Herrero. Megjithatë, "rreziku i reputacionit të shkeljes së mundshme të sanksioneve perëndimore do të ishte një hap i madh për PBOC dhe për këtë arsye e bën atë shumë të pamundur," tha ajo."Fitimet afatgjata të afrimit me Rusinë mund të mos përputhen me ndikimin e investitorëve perëndimorë që humbasin papritur interesin për Kinën," shtoi ajo.

Sanksionet e vendosura nga Shtetet e Bashkuara dhe Bashkimi Evropian nënkuptojnë se dy prodhuesit kryesorë të avionëve në botë, Boeing ( BA ) dhe Airbus ( EADSF ), nuk janë më në gjendje të furnizojnë pjesë këmbimi ose të ofrojnë mbështetje për mirëmbajtjen për linjat ajrore ruse. E njëjta gjë vlen edhe për prodhuesit e motorëve reaktiv.

Kjo do të thotë se linjat ajrore ruse mund të mbeten pa pjesë brenda disa javësh, ose të fluturojnë aeroplanë pa zëvendësuar pajisjet aq shpesh sa rekomandohet për të operuar në mënyrë të sigurt. Në fillim të këtij muaji, një zyrtar i lartë rus tha se Kina ka refuzuar të dërgojë pjesë avionësh në Rusi ndërsa Moska kërkon furnizime alternative. Valery Kudinov, kreu i aftësisë fluturuese në agjencinë ruse të transportit ajror, u citua nga agjencia shtetërore ruse e lajmeve Tass të ketë thënë se Rusia do të kërkojë mundësi për të marrë pjesë nga vende, përfshirë Turqinë dhe Indinë, pas një përpjekjeje të dështuar për t'i marrë ato nga Kina.

"Me sa di unë... Kina refuzoi," citohet të ketë thënë Kudinov.

Në përgjigje të kërkesës së bërë nga CNN , ministria e jashtme e Kinës përsëriti kundërshtimin e Pekinit ndaj sanksioneve duke shtuar se Kina dhe Rusia do të mbajnë "bashkëpunim normal ekonomik dhe tregtar".

Kina dhe Rusia krijuan një sipërmarrje të përbashkët të aviacionit civil në vitin 2017 për të ndërtuar një aeroplan të ri pasagjerësh me distanca të gjata, me trup të gjerë, duke kërkuar të rivalizojë dypolin e Boeing dhe Airbus. Prodhimi i CR929 ka filluar , por mosmarrëveshjet për furnitorët kanë shkaktuar vonesa. Avioni fillimisht pritej t'u ofrohej klientëve në vitin 2024. Por Rusia e shtyu afatin kohor nga 2028 në 2029.

Përveç veprimeve të lartëpërmenduara nga Kina gjithashtu dhe Banka Botërore ka ndërprerë të gjitha programet e saj në Rusi dhe Bjellorusi pas pushtimit të Ukrainës. Ajo nuk kishte miratuar asnjë kredi apo investim të ri për Rusinë që nga viti 2014, dhe asnjë për Bjellorusinë që nga viti 2020.

Më e habitshme, ndoshta, është vendimi i Bankës Aziatike të Investimeve në Infrastrukturë me bazë në Pekin për të bërë të njëjtën gjë. Në një deklaratë në fillim të këtij muaji, ajo tha se po pezullonte të gjitha aktivitetet e saj në lidhje me Rusinë dhe Bjellorusinë "ndërsa lufta në Ukrainë po shpaloset". Lëvizja ishte "në interesin më të mirë" të bankës, shtoi ai./Laura HE, CNN

SI.E./Shqiptarja.com

TAG:
• vladimir putin
• Rusi
• Kine