Skënderbeu, gati padia
ndaj UEFA për prishje imazhi

Klubi i Skënderbeut ka nisur mbrojtjen, edhe pse Komisioni i Disiplinës në UEFA ende nuk ka dhënë vendimin final. Siç dihet, Komisioni i Kontrollit dhe Etikës në UEFA ka kërkuar 10 vjet përjashtim nga Kupat e Europës për Skënderbeun dhe një gjobë prej 1 milionë eurosh. Report Tv mëson se drejtuesit e klubit korçar kanë zgjedhur një studio ligjore në Zvicër, që është e specializuar për çështje sportive.

Hapi i parë i kësaj studioje është kërkesa në UEFA për të dhënë relacionin e plotë që është ndërtuar dosja prej 93 faqesh. Burime të Report Tv tregojnë se mbrojtja do të përdorë mungesën e fakteve konkrete, përgjime dhe të penduar, sepse gjithçka në akuza është ngritur në bazën e dyshimeve. Ndërsa pretendimi tjetër është që të hiqen të gjitha pikat në raport ku indirekt preket Skënderbeu, edhe pse të përfshirë janë kundërshtarët që kanë luajtur me të.

Por ajo që është më kryesorja dhe që duket një betejë e fituar nga studio e avokatisë së Skënderbeut është padia ndaj UEFA-s për prishje të imazhit të klubit korçar, pasi raporti duhej të ishte konfidencial dhe jo të shpërndahej në media, duke bërë jehonë edhe në mediet ndërkombëtare. Ka optimizëm nga avokatët dhe minimalisht ata besojnë që Skënderbeu mund të dënohet në 2 vjet. Asnjëherë nuk ka ndodhur një ulje kaq e madhe, gjithsesi, duhet të presim vendimin, që me siguri që do të apelohet dhe kjo çështje do të zgjasë, pa harruar edhe efektet që do të japë në futbollin shqiptar.  

e.gj/Shqiptarja.com