Tre ditë pas publikimit të videoskandalit të kryebashkiakut të Dibrës Shukri Xhelili i cili i kërkon favore seksuale një 20 vjeçareje në këmbim të një vendi pune, i ati i vajzës kërkon mbrojtje nga shteti.

Në një komunikim telefonik në Report Tv, ai shprehet se deri mëngjesin e sotëm ka patur një patrullë policie në mbrojtje, por më pas është larguar. për rrjedhojë ai dhe familja e tij ndihen të kërcënuar e të pambrojtur.

"Deri sot në mëngjes kam qenë i mbrojtur. Tani nuk jam. Jam mbyllur brenda. Në rrugë kam frikë të dal," tha ai.

Babai i 20-vjeçares u shpreh se ndaj tyre ka patur presione, por pa dhënë detaje. kërkesa e tij është që shteti t'i largojë nga Shqipëria.

"I bëj thirrje shtetit që brenda 24 orëve të më stabilizojë fëmijët dhe gruan. vet po rri në Peshkopi", ishte apeli i kryefamiljarit të vajzës që denoncoi videoskandalin e ish-kryebashkikaut të Dibrës Shukri Xhelili.

Më tej ai rrëfeu se vajza e tij është joshur nga Xhelili kur ajo ka kërkuar punë. Nga ana tjetër ai shprehu vlerësim për djalin e ish-kryebashkiakut të cilin tha se e ka patur shef kur punonte në Llixha.

Nëse shteti nuk do t'u ofrojë mbrojtje atëherë familja e 20 vjeçares do të ngujohet në shtëpi.