Skandali në FIFA, merret në pyetje
Sepp Blatter, i përfshirë edhe Platini

E premte e zezë për Presidentin në detyrë të FIFA-s Sepp Blatter. Zvicerani është marrë në pyetje papritur nga zyrtarët e prokurorisë së Zvicrës në bashkëpunim me autoritetet amerikane.
 
Blatter kishte planifikuar që të jepte një konferencë shtypi, por në momentet e fundit e ka anuluar duke sjellë ankth dhe panik në zyrat e qeverisë së futbollit botëror.

Blatter është marrë në pyetje nga Prokurori i Përgjithshëm, ndërsa janë zhvilluar kontrolle në selinë e FIFA-s dhe zyrën e tij, si dhe janë sekuestruar dokumente me vlerë për hetimet.

Blatter akuzohet për korrupsion, keqmenaxhim dhe ryshfet për botërorin e Katarit, por jo vetëm. Zyra ligjore në Zvicër, ka pohuar se hetimet përfshijnë edhe disa kontrata televizive, të cilat Blatter i kishte nënshkruar me ish shefin e futbollit në Karaibe Jack Warner, në 2005.
 
Blatter dyshohet edhe për një aferë në vitin 2011 me presidentin e UEFA-s Mishel Platini, të cilit i ka paguar 2 mln Franga për punë të bëra mes viteve 1999 dhe 2002. Akuzat dhe hetimet mund të vendosin në diskutim edhe kandidatimin e francezit për President të FIFA-s.

Pak ditë më parë u pezullua Sekretari i Përgjithshëm, Jerome Valcke, më parë për llogari të FBI 14 zyrtarë të qeverisë botërore të futbollit u arrestuan dhe 11 prej tyre vazhdojnë të qëndrojnë pas hekurave.

Ndërkohë që sot, FIFA ka konfirmuar se Kupa e Botës për vitin 2022 në Katar do të fillojë me 21 nëntor dhe do të përfundojë me 18 dhjetor, pra në dimër


d.b/shqiptarja.com