“Qëllimi i këtij monitorimi nuk ka lidhje me lëvizjen e mësuesve apo situata të tjera punësimi, por ka të bëjë me hartën që Ministria e Arsimit dhe Sportit po ndërton për nevojat e formimit profesional të mësuesve”, - u shpreh Malaj. Në testim nuk do të futen mësuesit që kanë arritur shkallën e parë të kualifikimit dhe kanë mbi 20 vite eksperiencë pune. Provimi do të zhvillohet në 13-të Drejtoritë Arsimore Rajonale. Pyetjet e testimit janë hartuar nga Instituti i Zhvillimit të Arsimit. Mësuesit do të vlerësohen në 4 fusha siç janë planifikimi, aspektet metodike-pedagogjike, stili i komunikimit dhe etika e përdorur nga punonjësit arsimor si edhe përgatitja shkencore e mësuesve dhe zhvillimi i tyre profesional.
Rezultatet
Zëvendësministrja e Arsimit ka bërë të ditur edhe rezultatet e këtij testimi për mësuesit e Tiranës. Sipas saj vetëm 4 % e mësuesve u vlerësuan maksimalisht, ndërsa rezultojnë me probleme mësuesit e ciklit parashkollor. “Testimi që u krye në Tiranë, tregoi se gjysma e stafit mësimor në kryeqytet ka mangësi në mënyrën e mësimdhënies, planifikimit dhe komunikimit dhe kanë nevojë për t’u kualifikuar dhe përmirësuar standartët e punës së tyre. Instituti i zhvillimit të arsimit në raportin përfundimtar ka sqaruar se në këtë testim ku morën pjesë 1651 mësues dhe drejtues vetëm 4 % mësuesve u vlerësuan maksimalisht në të gjithë komponentët e testit. Rezultatet më të dobëta i kanë patur mësuesit e ciklit parashkollor”, - theksoi Malaj.
Në lidhje me raportin e fundit të Bankës Botërore, ku rreth 60% e nxënësve rezultonin analfabet në matematikë Zëvendësministrja Nora Malaj deklaroi se ato i referohen rezultateve për vitin 2012-të. Sipas saj prandaj MAS po zhvillon testimin e mësuesve, rezultatet e të cilit janë më se të domosdoshme në orientimin e duhur të politikave të ministrisë për hartimin e një skeme të re kualifikimi dhe trajnimi profesional të mësuesve shqiptarë.
MAS: Provimi me 30 pyetje, nuk ndikon te vendi i punës
Nëpërmjet testimit për “Identifikimin e Nevojave dhe Zhvillimit Profesional” Ministria e Arsimit kërkon të identifikojë se cili është niveli aktual i arsimtarëve , proces që lidhet ngushtë me performancën por edhe rezultatet e nxënësve shqiptarë në arsimin parauniversitar. Provimi do të ketë 30 pyetje, dhe rezultatet e tij do të merren menjëherë sapo një arsimtarë ta përfundojë atë. Më herët ministria e Arsimit ka zhvilluar testimin “Mësues për Shqipërinë”, që lidhet me vendet e punës, ndërsa ky testim sipas MAS, nuk ka të bëjë me to.
Redaksia Online
(F.T/shqiptarja.com)