Sot një vit pa Dr. Florin...homazhe
përkujtimore në rrjete sociale /Foto

Florian Kondi, i njohur ndryshe si Dr. Flori, bën sot një vit që është larguar nga jeta. “Java me Dr. Florin” quhet nisma përkujtimore në rrjete sociale, e ideuar nga miku  i tij më i mirë, e njëkohësisht kolegu dhe ish-pjesëtar i grupit "West Side Family”, Landi Hysa.

Miq, artistë, familjarë e dashamirës të të ndjerit ia kanë dedikuar këtë javë veprave që ka lënë pas Flori. Në njërin prej postimeve në Instagramin e tij, Landi ka zbuluar dhe këngën e preferuar të Dr. Florit mes shumë krijimeve të tij, dhe ajo është kënga “Mbi Gjithçka”.

"Një këngë me mesazhin më të fortë të transmetuar që kërkon të jesh mbi veten në nivelet e vetmohimit e gjithashtu, t'a ofrosh veten si një sakrificë e gjallë për gjithçka konsiderohet VLERË, jo thjesht tek-tuk, jo sepse dikush po të sheh, jo sepse ke dhe mund te japësh disa thërrime, jo për sevap apo "se t'shef Zoti", jo sepse emri yt do dali te lajmet dhe do përmendet e do njihesh e do përshëndetesh si "Bamirësi", por sepse ti në heshtje, në mënyrë të fshehtë e të vazhdueshme do të vazhdosh të bësh të mirën, sepse e/i tillë je. Sot u bë një vit pa ty Flor. Mungon plako. Prapë mungon...", shkroi Landi pa fshehur mallin për mikun e tij.

Mësohet se sot do të organizohet një ceremeoni përkujtimore në nder të artistit, në Kishën që ai frekuentonte para se të ndërronte jetë,  ku do të transmetohet edhe një dokumentar për jetën dhe karrierën e tij.

Florian Kondi humbi jetën më 17 nëntor 2014, në moshën 35-vjeçare, nga një mbidozë kokaine. Artisti la pas bashkëshorten Blerinën dhe dy fëmijë, Kaltrinën 6 vjeç dhe Danielin, 2-muajsh.



Redaksia Online
(m.p/shqiptarja.com)

/Shqiptarja.com