KRUJË- Oficerët e BKH-së dhe SPAK kanë bastisur ditën e sotme shtëpinë e Ramazan Rrajës, nipi i deputetit socialist Rrahman Rraja. Ky kontroll në banesën e tij vjen pas një urdhër shoqërimi të lëshuar nga Prokuroria e Posaçme për Ramazan Rrajën lidhur me atentatin që është bërë katër vite më parë ndaj prokurorit Arian Ndoja.

Kontrollet u kryen mëngjesin e sotëm në disa banesa në zonën e Rinasit, Niklës dhe Krujës me qëllim kapjen e Ramazan Rrajës, por kontrollet rezultuan pa asnjë rezultat. Mbetet ende e paqartë arsyeja e urdhër shoqërimit ndaj Ramazan Rrajës, por dyshimet kryesore janë se lidhet me atentatin ndaj prokurorit Ndoja në vitin 2019.

SPAK pretendon se Ramzan Rraja, bashkë me kushëririn e tij dhe persona të tjerë kanë organizuar atentatit ndaj prokurorit Arian Ndoja më 1 nëntor 2019. Në atentat mbeti i vrarë shoferi Andi Maloku, dhe u plagos Landi Muharremi “Rrumi i Shijakut” dhe ish-prokurori i Durrësit, Arjan Ndoja. 

Ramazan Rraja është pyetur nga policia në muajin tetor, për vrasjen e trefishtë të mbikalimit të Fushë-Krujës, ku mes të vrarëve ishte kushëriri i Ervis Martinaj, Brilant Martinaj. Ramazan Rraja ka qenë në kërkim policor për vrasjen e trefishtë të mbikalimit të Fushë-Krujës për t'u marrë në pyetje, por në atë kohë nuk është gjetur. Në muajin tetor, pasi është kthyer nga jashtë është paraqitur personalisht dhe më pas është lënë i lirë. Kujtojmë se Rraja po ashtu, në 2021 u shpall në kërkim pasi hyri i maskuar e i armatosur në një lokal. Ramazan Rraja po ashtu më herët i arrestuar në Belgjikë dhe Gjermani për drogë.