Spitali i Traumës për herë të parë strukturë ambulatore! I shtohet skaneri që ekzaminon trupin në 3 minuta, Rama e inspekton bashkë me Manastirliun

Në vetëm 3 minuta, pacientët do të mund të njihen me gjendjen e tyre shëndetësore, falë një pajisjeje të re që do të vendoset në Spitalin e Traumës. Po ashtu, në këtë spital do të ketë strukturë ambulatore dhe shërbim okulistik.

Një skaner i ri i fjalës së fundit të teknologjisë, që në vetëm 3 minuta arrin të ekzaminojë gjithë trupin e pacientit është vendosur në spitalin Universitar të Traumës në Tiranë. 

“Kemi mundësuar që të kemi aparatura të reja bio-mjekësore. Janë 18 grafi digjitale, 4 skanera, 1 angiograf dhe pajisje të tjera të cilat tashmë janë instaluar edhe po vendosen në funksion në spitalet tona. Spitalit të Traumës i është shtuar një skaner i fjalës së fundit të teknologjisë ku mund të bëjnë edhe ekzaminime të tjera intervencionuese, përveç thjesht diagnostikuese. Kemi mundësi që të zhvillohemi më shumë në drejtim të imazherisë”, tha Manastirliu.

LEXO EDHE:
Me telefon dhe pa rrip sigurie tentuan të korruptojnë policinë rrugore, 4 shoferë të arrestuar në 24 orët e fundit në Tiranë (Video)

Kryeministri Edi Rama dhe Ministrja e shëndetësisë, Ogerta Manastirliu panë nga afër edhe punimet që po kryhen në Spitalin e Sëmundjeve të Brendshme tek Trauma, ku për herë të parë do të ketë një strukturë ambulatore.

“Jemi në fazën e parë të investimit të Spitalit të Traumës, ku tashmë puna ka filluar dhe jemi me ritme shumë të mira në rehabilitimin e një prej spitaleve shumë të rëndësishme që është spitali i sëmundjeve të brendshme, në këtë Korpus Universitar. Ka një kapacitet prej 60 shtretërish dhe brenda kësaj strukture, do të ketë për herë të parë një strukturë ambulatore. Faza e dytë vijon me rehabilitimin e Korpusit Qendror”, tha Manastirliu.

Një tjetër shërbim që pritet të hapet për herë të parë në këtë spital, është edhe ai i Okulistikës.

G.MO/r.k./Shqiptarja.com

TAG:
• spitali i traumes
• Tirane
• ministria e shendetesise
• ogerta manastirliu
• edi rama