Statusi kandidat, Hollanda
vendos nesër për Shqipërinë

HOLANDE- Holanda, një nga 5 vendet skeptike për Shqipërinë, do të vendosë nesër se çfarë qëndrimi do të mbajë në lidhje me statusin e vendit kandidat për Shqipërinë.
 
Ditë më parë kjo është bërë e ditur nga ambasadori i Holandës në Tiranë, Martin De La Beij. Ai ka shpjeguar se qeveria e tij do të diskutojë qëndrimin e saj përfundimtar me parlamentin më 17 qershor.
 
“Institucioni që do të vendosë është Ministria e Jashtme. Ajo do të konsultohet me parlamentin për pozicionin që do të mbajë qeveria për këtë çështje. Ministria po harton një letër, të cilën do t’ia paraqesë parlamentit në ditët në vijim. Diskutimet pritet të bëhen në Parlament në datën 17 qershor”, ka thënë La Beij.
 
Qeveria shqiptare ka lobuar shumë në Holandë, pasi është një nga vendet më skeptike në lidhje me qëndrimin e saj kundrejt dhënies së statusit Shqipërisë. Komisioni Europian përmes një progres raporti propozoi dhënien e statusit të vendit kandidat për Shqipërinë pa kushtëzuar këtë proces me reforma apo veprime që duheshin përmbushur.
 
Votimi për Shqipërinë do të mbahet në 27 qershor në Bruksel, ndërsa qeveria shqiptare ka nisur një ofensivë diplomatike për të kërkuar mbështetjen për dhënien e statusit. Kryeministri Edi Rama ishte para disa ditësh në Paris, për të lobuar për statusin e vendit kandidat, ndërsa pas takimit me presidentin francez, tha se ishte një takim përtej pritshmërive.

Redaksia Online
(e.s/shqiptarja.com)