Stërvitja e përbashkët ushtarake “Strike 2026”, mes forcave detare të NATO-s dhe Forcës Detare Shqiptare, po zhvillohet në gjirin e Vlorës, ku janë angazhuar pesë anije ushtarake në manovra të përbashkëta. Në stërvitje marrin pjesë dy anije të NATO-s dhe tre anije të Forcës Detare Shqiptare ku qëllimi kryesor është koordinimi dhe bashkërendimi i veprimeve në det, si dhe rritja e ndërveprueshmërisë mes forcave pjesëmarrëse.

Manovrat përfshijnë gjirin e Vlorës, zonën e Karaburunit dhe ishullin e Sazanit, ndërsa në aktivitet janë përfshirë edhe forcat ajrore. Stërvitja ka nisur të premten dhe pritet të vijojë deri më 19 tetor. 

Kjo është stërvitja e dytë e këtij lloji gjatë vitit 2026 në gjirin e Vlorës, me pjesëmarrjen e forcave detare të NATO-s dhe atyre shqiptare.

Ndërkohë, aktivitetet e stërvitjes “Strike 2026” parashikohet të shtrihen edhe në zona të tjera të bregdetit shqiptar, përfshirë Durrësin dhe Shëngjinin. Gjithashtu, një tjetër stërvitje e ngjashme në gjirin e Vlorës pritet të zhvillohet deri në fund të vitit.

Stërvitjet e përbashkëta synojnë forcimin e bashkëpunimit mes aleatëve dhe rritjen e gatishmërisë për operacione të koordinuara detare.