TIRANË- Ambasadorja e Suedisë në vendin tonë, Elsa Hastad ka zhvilluar një takim me kryeministrin Edi Rama, ku e ka informuar mbi aplikimin e vendit të saj në NATO.

Ajo ka publikuar një fotografi nga takimi me Ramën, ndërsa e ka falënderuar për mbështetjen e tij në këtë proces.

“Ky është një moment historik. Takim me kryeministrin Edi Rama, duke e informuar për vendimin e Suedisë për dorëzimin e aplikimit për anëtarësim në NATO. Faleminderit Kryeministër për takimin shumë të mirë dhe mbështetës!”, shkruan ajo.

Një ditë më parë Ministrja për Evropën dhe Punët e Jashtme, Olta Xhaçka e cila mori pjesë në takimin jo zyrtar të Këshillit të Atlantikut të Veriut është shprehur pro anëtarësimit të Finlandës dhe Suedisë në NATO.

Suedia mori vendimin zyrtar ditën e sotme për të paraqitur kërkesën për anëtarësim në NATO, duke ndjekur hapat e fqinjit të saj Finlandës.

Rendit zhvillimet sipas orarit:
Ora 18:38
Suedia do të bëjë kërkesë për anëtarësimin në NATO, Ministrja e Jashtme: Shqipëria do bëjë çdo gjë për të përshpejtuar procedurat

Ministrja e Jashtme Olta Xhaçka ka reaguar për vendimin e Suedisë për të kërkuar anëtarësimin në NATO. Xhaçka shkruan se Shqipëria do bëjë çfarëdo të jetë e nevojshme për të përshpejtuar procedurat.

“Vendimi  i Suedisë për të kërkuar anëtarësimin në NATO është një lajm i mirë për Aleancën dhe për sigurinë tonë kolektive. Shqipëria e mirëpret këtë vendim dhe do të bëjë gjithçka që është e nevojshme për të përshpejtuar procedurat.”, shkruan Xhaçka.

SI.E./Shqiptarja.com