Sulmet ndaj gazetarëve në veri të Kosovës, reagon ambasadori amerikan: Gazetaria e lirë është gurthemel i demokracisë, ndaloni kërcënimet!

Ambasadori i SHBA-së në Kosovë, Jeffrey Hovenier ka reaguar në lidhje me sulmin ndaj dy pjesëtarëve të ekipit të televizionit Klan Kosova në fshatin Zupç të Zubin Potokut duke thënë se e dënon ashpër sjelljen e personave dhunues dhe se media duhet të jetë e lirë nga kërcënimet.

Gazetarja dhe shoferi kanë pësuar lëndime trupore dhe janë dërguar në spital.

“SHBA-ja i bashkohet Asociacionit t Gazetarëve të Kosovës – AGK dhe Bashkimit Evropian në Kosovë për të dënuar fuqishëm sulmin e fundit në seri kundër gazetarëve të Kosovës. Mediat duhet të jenë në gjendje të punojnë lirshëm nga kërcënimet me dhunë dhe frikësim. Gazetaria e lirë dhe e pavarur është gurthemel i demokracisë”, ka thënë Hovenier.

Policia e Kosovës ka konfirmuar se të hënën është sulmuar një ekip i gazetarëve të televizionit Klan Kosova në fshatin Zupç të Zubin Potokut, duke lënduar dy nga pjesëtarët e ekipit dhe duke shkaktuar dëme materiale. “Sulmi ndaj tyre dyshohet se është kryer nga disa persona të maskuar, të cilët me mjete të forta (gurë) kanë sulmuar automjetin e mediumit dhe gazetarët të cilët ishin në detyrë”, thuhet në njoftimin e Policisë së Kosovës, që më tutje thotë se ka nisur hetimet lidhur me këtë rast.

Lajmi kryesor:

Tensionet në veri të Kosovës, Kurti takon krerët e KFOR dhe EULEX-it: Nuk duhet të ketë barrikada në asnjë rrugë

F.D/Shqiptarja.com

TAG:
• Jeffrey Hovenier