Sulmet ndaj Lu, Ngjela: Pse po 
shkon, o Sali, në rrugë pa krye?

Ish-kryeministri Sali Berisha hodhi akuza të ashpra mbrëmjen e kaluar në drejtim të ambasadorit të SHBA në Tiranë, Donald Lu. Berisha tha se Lu kërkon largimin e Llallës pasi ky i fundit e ka akuzuar për korrupsion. 

Ndërkohë, në një postim në Facebook, avokat Spartak Ngjela shkruan se Berisha, me akuzat ndaj Lu, po shkon në rrugë të gabuar. "E tmerroi ambasadori amerikan Lu dje kur i tha se nuk do ketë më prokuror që të mbrojë krimin. Kurse Saliu pastaj iu thotë shqiptarëve se, meqë ambasadori amerikan ka shkuar te prokurori shqiptar për të mbrojtur interesin e një kompanie amerikane, është i korruptuar. Kurse Saliu që ka shitur si kryeministër shqiptar interesin e Shqipërisë është i pakorruptuar. Po pse ponshkon, O Sali, në një rrugë pa krye? Nuk ka dhe nuk do të ketë më prokuror në mbrojtjen tënde. Dhe mos i sill më dëm shqiptarëve me gjithë hordhinë tënde, se nuk iu bën dot më asgjë. Krimi shqiptar, në një spektër të përgjithshëm, është sot në dekadencë të plotë dhe drejt rrugës së asgjësimit", shkruan Ngjela.

Postimi i plotë i Ngjelës: 

Sa më afër fundit, aq më shumë gabojnë bandat.
Kështu është sot i gjithë korrupsioni shqiptar. Po flet me vetë.

l.
Saliu sot ishte në makthin e tij maksimal.
E tmerroi ambasadori amerikan Lu dje kur i tha se nuk do ketë më prokuror që të mbrojë krimin. Kurse Saliu pastaj iu thotë shqiptarëve se, meqë ambasadori amerikan ka shkuar te prokurori shqiptar për të mbrojtur interesin e një kompanie amerikane, është i korruptuar. Kurse Saliu që ka shitur si kryeministër shqiptar interesin e Shqipërisë është i pakorruptuar. Po pse ponshkon, O Sali, në një rrugë pa krye? Nuk ka dhe nuk do të ketë më prokuror në mbrojtjen tënde. Dhe mos i sill më dëm shqiptarëve me gjithë hordhinë tënde, se nuk iu bën dot më asgjë. Krimi shqiptar, në një spektër të përgjithshëm, është sot në dekadencë të plotë dhe drejt rrugës së asgjësimit.

Askush nuk e merr dot me mend sesi është bashkuar krimi më prokurorinë. Konstatohet tani se ka pasur një ligjësi të brendshme në këtë çështje: prokuroria e korruptuar, pasi shpëton pushtetarët dhe i lejon që të vjedhin shtetin; marrin lejen nga pushtetarët që të paguhen nga krimi i rrugës ose krimi i organizuar, që edhe ky të vijojë rrugën e vet. Ky quhet Krim i Përgjithshëm që sundon një shoqëri. Dhe sigurisht që i gjithë faji historik bie mbi prokurorinë se nuk ngre asnjë akuzë për krimin që paguan. Domethënë që shteti nuk funksionon. Kjo është Shqipëria e sotme: një shoqëri e drejtuar nga krimi ku Prokurori i Përgjithshëm ka qenë Kryetari i Krimit të Përgjithshëm.

ll.
Kjo është gjendja, dhe pikërisht këtë gjendje kërkon të mbajë ende në forcë Berisha. Por dhe Ambasadori Amerikan ia hoqi dje, me gjuhë të drejtpërdrejtë, thelbin e mbrojtjes për të fshehur antiamerikanizmin e tij me pretekstin e Ramës. Kjo është arsyeja e çthurjes mendore të Saliut. Po pse, o i mjerë! ende nuk e ke kuptuar që, të gjithë bashkë, duhet ta dorëzoni qetësisht dhe pa fare zhurmë gjënë e vjedhur?

Redaksia Online
l.q/Shqiptarja.com