Në kohë lufte, mediat duhet t’i tregojnë konfliktet nga perspektiva njerëzore e atyre që vuajnë dhe të shmangin shndërrimin në një “megafon” të pushtetit, tha të hënën Papa Leone XIV.

“Gjithmonë, por veçanërisht në rrethanat dramatike të luftës si ato që po përjetojmë, informacioni duhet të ruhet nga rreziku që të shndërrohet në propagandë,” tha ai në një fjalim drejtuar gazetarëve të TG2.

Në këto kohë konflikti, “detyra e gazetarëve, për të verifikuar lajmet në mënyrë që të mos bëhen megafon i pushtetit, bëhet edhe më urgjente dhe delikate—madje thelbësore,” vijoi ai.

Papa theksoi se është detyrë e mediave “të tregojnë vuajtjen që lufta u sjell gjithmonë popullsive, të tregojnë fytyrën e luftës dhe ta rrëfejnë atë përmes syve të viktimave, në mënyrë që të mos shndërrohet në një videolojë.”

Ai pranoi se “nuk është e lehtë brenda pak minutave të një edicioni lajmesh dhe analizave të tij”, por nënvizoi se “kjo është sfida.”

Duke reflektuar mbi 50-vjetorin e themelimit të TG2, Papa theksoi rëndësinë e perspektivës njerëzore në media përballë zhvillimeve të shpejta teknologjike.

Ai vuri në dukje se në dekadat e fundit gazetaria televizive ka pësuar ndryshime të shumta. Në këtë drejtim, ai theksoi se “asnjë inovacion teknologjik nuk mund të zëvendësojë kreativitetin, gjykimin kritik dhe lirinë e mendimit.”

“Meqenëse sfida e kohës sonë është inteligjenca artificiale, mendoj për nevojën për të rregulluar komunikimin sipas paradigmës njerëzore dhe jo asaj teknologjike,” shpjegoi ai, duke shtuar se kjo do të thotë, në fund të fundit, të dimë të dallojmë mes mjeteve dhe qëllimeve.

Të dielën, Papa kërkoi një armëpushim në Lindjen e Mesme, duke bërë komentet më të forta deri më tani lidhur me këtë çështje.

“Në emër të të krishterëve të Lindjes së Mesme dhe të gjithë grave dhe burrave me vullnet të mirë, u bëj thirrje atyre që janë përgjegjës për këtë konflikt,” tha Papa. “Ndërpriteni zjarrin që të mund të rihapen rrugët e dialogut. Dhuna nuk mund të çojë kurrë te drejtësia, stabiliteti dhe paqja që popujt presin.”

Papa nuk përmendi me emër Shtetet e Bashkuara apo Izraelin, duke ruajtur neutralitetin diplomatic të Vatikanit, por përmendi sulmet që goditën një shkollë, një referencë e dukshme për sulmin me raketë ndaj një shkolle fillore në Iran në ditët e para të luftës, ku u vranë mbi 165 persona, shumë prej tyre fëmijë.