Sulmi i Rusisë mbi Ukrainën, rriti çmimin e naftës, Bashkimi Tregtar: Karburanti në vend do kapërcej 200 lekë për litër! Energjia elektrike shtrenjtohet me 41 euro për megavat

Roli dominues i Rusisë për furnizimin me gaz, mund të rris më tej çmimin e energjisë elektrike dhe të karburantit në Evropë. Rreth 35% e furnizimit me gaz natyror të Evropës sigurohet nga Rusia. Menjëherë pas nisjes së pushtimit të Ukrainës çmimi i naftës në bursën ndërkombëtare pësoj një rritje të menjëhershme, duke shkuar në mbi 105 dollarë për fuçi për herë të parë që nga viti 2014.

Drejtuesja e Bashkimit Tregtar të Shqipërisë Mira Pogaçi thotë se ndikimet e konfliktit Rusi-Ukrainë, do të ketë efekte të gjithanshme në Shqipëri.

“Mendojmë që do të ndikoj në mënyrë masive pasi Rusia është tregu kryesor nga ku importojmë drithëra, grurë, misër, soj, më pas vjen Serbia dhe Ukraina”, pohon Pogaçi.

LEXO EDHE:
Meçollari: Rusia s’ka kapacitet të sulmojë, një vend të NATO-s, por nëse merr Ukrainë fiton avantazh

Sa i takon tregut të hidrokarbureve Pogaçi, pohon se çmimi i naftës mund të kapërcej mbi 200 lekë për litër, madje i druhet faktit që efektet e këtij konflikti mund të kenë pasoja në shumë sektor të tjerë të ekonomisë së Shqipërisë.

“Rritja e çmimit të gazit, të karburanteve, ku nafta po tregtohet në 100 dollar barela, duke shkuar në nivel historik. Nafta ka arritur në 200 lekë dhe pritet të rritet më tej. Të gjitha këto do të kenë një efekt zinxhir dhe shpresojmë të mos ketë një efekt si ortek bore që do të pasohet në të gjitha industritë, në udhëtime, në aviacion pasi aviacioni furnizohet nga Rusia për metale, dhe tregu i metaleve që dje ka shkuar në nivelin më të lartë që prej 2010, padyshim që kriza do të reflektohet në të gjitha produktet në treg”, tha Pogaçi.

Vetëm nga luhatjet e fundit të tregjeve ndërkombëtare pa nisur ende konflikti Rusi-Ukrainë, çmimi i karburantit në vend arriti në nivele rekord ku benzina kaloj 195 lekë për litër, nafta në nivelin 194-195 lekë për litër dhe gati në 90 lekë/litri.

Bazuar edhe në bursën HUPX, çmimi i energjisë, u rrit menjëherë pas sulmit rus, nga 178.4 euro për megavat që ishte çmimi një ditë më parë, sot ka arritur në 219.4 euro për megavat, dhe rritja pritet të vazhdojë edhe ditët në vijim ku të shtunën një megavat pritet të shitet me 229.2 euro për megavat.

Praktikisht brenda dy ditëve 24-25 shkurt çmimi i energjisë elektrike është rritur me 40.9 euro për megavat.

SI.E./Shqiptarja.com

TAG:
• rusia sulmon ukrainen