Teherani kërcënon me përdorimin e armëve që nuk janë përdorur kurrë më parë! Izraeli thirrje për sanksione ndaj programit të raketave të Iranit

Izraeli bëri thirrje sot për sanksione të reja kundër Iranit si pjesë e përgjigjes ndaj një sulmi të paprecendetë ajror që Teherani dhe disa prej aleatëve të tij ndërmorën ndaj shtetit hebre natën mes 13 - 14 prillit 2024.

Ministri i Jashtëm izraelit Israel Katz, shkruante në mediat sociale se ai kishte kontaktuar më shumë se 30 vende për të nxitur sanksione kundër programit të raketave të Iranit, si dhe për shpalljen e Korpusit të Gardës Revolucionare të Iranit, një organizatë terroriste.

“Irani duhet të ndalet tani, para se të jetë tepër vonë”, shkroi ai.

Ndërkohë Abolfazl Amouei, një zëdhënës i Komitetit të Sigurisë Kombëtare të Parlamentit iranian, i tha një stacioni lokal të lajmeve të hënën se Republika Islamike “do të përballet me çdo agresion izraelit dhe do t’i përgjigjet atij”.

“Ne jemi gati të përdorim armë që nuk i kemi përdorur më parë. Ne kemi plane për të gjithë skenarët dhe u bëjmë thirrje sionistëve të veprojnë në mënyrë racionale”, theksoi zyrtari për Al-Mayadeen News, sipas “Economic Times”

Ndërkohë Ministri i Jashtëm iranian, Hossein Amir-Abdollahian siguroi Kinën se nuk do të përshkallëzojnë më tej situatën në Lindjen e Mesme. Ai zhvilloi një telefonatë me homologun kinez, Wang Yi pas sulmit që Irani ndërmori ndaj Izraelit. Ministri iranian tha se Teherani përsëriti se ishte "i gatshëm të tregonte përmbajtje" dhe “nuk ka ndërmend përshkallëzimin e mëtejshëm”.

Wang dënon sulmin izraelit, duke falënderuar Iranin që nuk synoi vendet fqinje ndërsa bombardonte Izraelin.

“Kina beson se Irani mund të menaxhojë mirë situatën dhe të shmangë përshkallëzimin e mëtejshëm në rajonin e Lindjes së Mesme duke ruajtur sovranitetin dhe dinjitetin e tij”, u shpreh ministri kinez.

Ndërkohë, kryeministri izraelit Benjamin Netanyahu i bëri thirrje komunitetit ndërkombëtar që të "mbetet i bashkuar" përballë "agresionit iranian, i cili kërcënon paqen botërore" . Nga ana tjetër shefi i Shtabit Ushtarak Herzi Halevi tha se Izraeli është duke i shqyrtuar hapat që do t’i ndërmarrë, por se sulmi i Iranit “do të marrë përgjigje”. Ai i bëri këto komente gjatë një vizite në bazën ajrore Nevatim, për të cilën Izraeli tha se pësoi dëme të vogla gjatë sulmit iranian.

E teksa qeveria izraelite po shqyrton se si do t’i përgjigjet sulmeve të Iranit, Shtetet e Bashkuara i bënë thirrje Izraelit të tregojë vetëpërmbajtje dhe të shmangë përshkallëzimin e konfliktit në Lindjen e Mesme.

“Ne nuk duam përshkallëzim, por do të vazhdojmë të mbështesin mbrojtjen e Izraelit dhe do të vazhdojmë të mbrojmë personelin tonë në rajon”, tha Sekretari Amerikan i Shtetit, Antony Blinken në nisje të një takimi me zëvendës kryeministrin e Irakut Mohammed Ali Tamim.

Po ashtu edhe Sekretari amerikan i Mbrojtjes Lloyd Austin zhvilloi një bisedë telefonike me homologun e tij izraelit Yoav Gallantme fokus pasojat e sulmit iranian. Austin "riafirmoi mbështetjen e vendosur të Shteteve të Bashkuara për mbrojtjen e Izraelit" dhe "ripohoi interesin e përbashkët të dy vendeve për stabilitetin rajonal".

Rendit zhvillimet sipas orarit:

Të Fundit Të Parat

SI.E./S.G/Shqiptarja.com

TAG:
• irani sulmon izraelin
• iran
• Izrael