Kosovë/ Sulmi në Banjskë ku mbeti i vrarë Afrim Bunjaku, Gjykata dënon me burgim të përjetshëm dy prej autorëve! 30 vite për tjetrin (VIDEO)

Kosovë - Gjykata në Kosovë dënoi me burg përjetë Blagoje Spasojeviç dhe Vladimir Tolliç dhe me 30 vite burgim Dusha Maksimoviç, të tre të përfshirë në sulmin terrorist të Banjskës, fundshtatorin e vitit 2023.

Në shpalljen e vendimit për ngjarjen ku u vra rreshteri i Policisë së Kosovës Afrim Bunjaku, i pranishëm ishte vetëm Dushan Maksimoviç. Gjyqtari Ngadhnjim Arrni tha se qëllimi i grupit të armatosur në Banjskë, ishte destabilizimi i strukturave themelore të Kosovës.

"Përmes planit të mirëorganizuar, kanë tentuar që të shkëpusin pjesën veriore të territorit të Kosovës dhe këtë pjesë t’ia bashkojë Serbisë”, tha ai.

LEXO EDHE:
Sulmi i armatosur tre vite më parë, analiza: Banjska me vendim në Prishtinë, e pa aktakuzë në Beograd

Pas shpalljes së aktgjykimit, prokurori special, Naim Abazi, i cili kishte kërkuar burg të përjetshëm për të tre, tha se vendimi është i mangët, pasi në të nuk është përfshirë pjesa tjetër e të akuzuarve, përfshirë Milan Radoiçiç.

Ai shtoi se Prokuroria po bën të gjitha përpjekjet që ata të sillen para drejtësisë, ndërsa avokati i familjes, Arianit Koci u shpreh se nuk ka drejtësi pa u dënuar organizatorët e vërtetë.

Në sallën e parlamentit ku këtë të premte zhvillohej një seancë, lajmi për vendimin u prit me duartrokitje nga deputetët.

Vendimi u prit mirë edhe nga zyrtarët e qeverisë së Kosovës. Ushtruesja e detyrës së presidentit të Kosovës, Albulena Haxhiu tha se dënimi tregoi se sulmi ndaj Policisë së Kosovës, ndaj rendit kushtetues dhe ndaj sigurisë së vendit nuk do të mbetet pa ndëshkim.

Ndërsa, ministri i Punëve të Brendshme Xhelal Sveçla u shpreh se vendimi i gjykatës do të duhej të ishte dënim maksimal për të gjithë të përfshirët.

Milan Radoiçiç, ish-nënkryetar i Listës Serbe, partisë më të madhe të serbëve në Kosovë, raportohet se ndodhet në Beograd, ku gëzon përkrahjen e Serbisë pasi ka marrë përgjegjësinë për sulmin e armatosur në Banjskë.

Radoiçiç dhe 41 të dyshuar të tjerë akuzohen për terrorizëm, vepra të rënda kundër rendit kushtetues dhe sigurisë së Kosovës, financim terrorizmi dhe për pastrim parash.

Kosova e ka karakterizuar sulmin si akt terrorizmi dhe e ka akuzuar Serbinë për përfshirje, por Beogradi i ka hedhur poshtë pretendimet e autoriteteve në Prishtinë.

Akuza ndaj 45 individëve, u ngrit rreth një vit pas sulmit. Gjykata vendosi ta veçonte procedurën penale ndaj 3 të dënuarve të kësaj të premteje që ndodhen në paraburgim nga shtatori i 2023-tës, kurse për 42 të tjerë refuzoi kërkesën e Prokurorisë Speciale të Kosovës për gjykim në mungesë.

P.J/Xh.K/Shqiptarja.com

TAG:
• Dushan Maksimoviçi
• Vladimir Tolliçi
• Bllagoje Spasojeviç
• vritet polici ne kosove
• kosove
• Afrim Bunjaku
• banjske