Në mungesë të vërtetimit të provave, trupi gjykues në Gjykatën Themelore të Mitrovicës në veri të këtij qyteti, ka shpallur sot të pafajshëm Sylejman Selimin, Ismet Haxhën, Nexhat Qubrelin dhe Shefki Hysenin.

Ata janë akuzuar se në vitin 1998 kanë kryer krime lufte në Kosovë, ndërsa Shefki Hyseni akuzohet edhe për dhunim seksual ndaj një femre shqiptare.

Avokati Ibrahim Dobruna, i cili është mbrojtës i Sylejman Selimin ka konfirmuar për mediat se, klienti i tij është liruar nga të gjitha akuzat në rastin e parë në Mitrovicë.

Por, Dobruna ka thënë se, Selimi do të qëndrojë edhe më tutje në Burgun e Dubravës për shkak të rastit tjetër që ka me “Grupin e Drenicës” e që seanca do të mbahet me 12 qershor.

“Është liruar nga të gjitha akuzat dhe është shpallë i pafajshëm për krime lufte kundër popullatës civile lidhur me rasti e parë në Mitrovicë”, ka thënë ai.

Marrë nga Kosova Press