TIRANE, 20 Dhjetor/ATSH/-"Duhet të ndërtojmë një brez të ri që nuk e sheh policinë si mjet represiv, por si trupë në shërbim të qytetarëve", deklaroi sot Ministri i Brendshëm, Saimir Tahiri, gjatë një takimi me përfaqësues të bordeve të prindërve të shkollave 9-vjeçare të qytetit të Tiranës dhe drejtuesit e këtyre shkollave.
Në takim, u diskutua për forcimin e bashkëpunimit midis familjes, shkollës dhe policisë me synim rritjen e sigurisë në shkollat e kryeqytetit si dhe krijimin e një klime sa më të shëndetshme për edukimin e fëmijëve në këto institucione arsimore.
Takimi është zhvilluar në formën e një bashkëbisedimi, ku ministri i Brendshëm u është përgjigjur pyetjeve dhe shqetësimeve të ngritura nga përfaqësuesit e bordeve të prindërve.
Tahiri i siguroi të pranishmit për gadishmërinë e plotë që ka MPB dhe Policia e Shteti për të qenë sa më aktivë në bashkërendimin e veprimeve mes trupave pedagogjike, prindërve dhe uniformave blu për të bërë të mundur parandalimin e çdo shfaqjeje të tendencave të dhunshme te fëmijët.
"Shkolla është mjedisi ku mund të ndërtohet, trekëndëshi perfekt për të garantuar siguri, që është vetë fëmija, mësuesi dhe Policia e Shtetit. Marrëdhënien mes bordit të prindërve dhe Policisë ta kthejmë në një marrëdhënie permanente që nuk thirret sa herë ka probleme, por të jetë një marrëdhënie shkëmbimi informacioni periodik, për nxënës që duhen mbajtur nën përkujdesje më të madhe", deklaroi Tahiri.
Ministri theksoi se do arrijmë të ndërtojmë një mjedis më të sigurt për fëmijët që sot janë në shkolla dhe përtej, në qoftë se të gjithë bashkë dëshmojmë në mënyrë pa ekuivoke se jemi në të njëjtin krah./a.gegvataj/