Taulant Balla ironizon LSI: 
Ajo forca e parë nga shkoi???

Deputeti i Elbasanit, Taulant Balla pas përfundimit të numërimit të votave të zgjedhjeve të 25 qershorit ka falenderuar mbështetësit e Partisë Socialiste por nuk ka kursyer ironinë për LSI.
 
Këmbënguljes së LSI se do të ishte forcë e parë në zgjedhje, Balla i është  përgjigjur sot: “Ajo forca e parë nga shkoi???”
  
“Falenderimi i parë u shkon të gjithë mbështetësve të këtij drejtimi që mori Shqipëria sot, një drejtim që i bën mirë Shqipërisë.
 
E rëndësishme është që ne do ta lexojmë mirë të gjithë këtë besim të madh që na dha qarku i Elbasanit.
 
Jam shumë i sigurt që gjithçka kemi nisur, për t’u shërbyer shqiptarëve në të shtatë bashkitë e qarkut të Elbasanit, do ta bëjmë me përgjegjësi të lartë.
 
Nuk e shohim këtë thjesht dhe vetëm si një fitore elektorale, por e shohim si marrjen e një besimi dhe një përgjegjësie shumë të madhe të shumë punëve që na presin për të bërë së bashku.
 
Ne nuk heqim dorë nga angazhimi ynë për sa më shumë punësim, për sa më shumë mirëqenie dhe sigurisht për një shtet që t’u shërbejë të gjithëve.
 
Procesi i numërimit në Elbasan ishte një proces i vështirë, por gjithçka shkoi brenda standardeve dhe tashmë çdo parti politike duhet të pranojë rezultatin.
 
Ajo forca e parë nga shkoi??? Fitore dhe Faleminderit!”, është shprehur Balla.

Redaksia Online
Al.N/Shqiptarja.com