Të gatuajmë me zonjën Vjollca/ Gjizanik dhe Tost me patate në tigan

Gjizanik

Përbërësit:

1 kg gjizë

5 të verdha veze

2 lugë gjelle miell misri

2 lugë gjelle miell gruri

Nenexhik

1 tufë qepë të njoma

100 gr gjalp

Piper i kuq

Kripë dhe piper i zi

Përgatitja:

Rrahim të verdhat e vezës, shtojmë pak vaj ulliri, hedhim qepët e njoma të prera në unaza dhe nenexhikun të prerë hollë, nëse është i freskët. Shtojmë miellin e misrit dhe të grurit dhe i përziejmë. Në fund shtojmë gradualisht gjizën. Pasi e trazojmë mirë dhe është krijuar një masë homogjene e vendosim në nje tavë (mundësisht tavë dheu ) të lyer me pak gjalpë. Nivelojmë mirë sipërfaqen e gjizës dhe më pas me anë të një luge formojmë mbi masë gropëza të vogla si dekor. Shtojmë gjalpin e shkrirë me piper të kuq, duke e shpërndarë në të gjithë sipërfaqen. E vendosim në furrë në 180 gradë Celsius për 20-30 minuta.

Tost me patate në tigan

Përbërësit:

500 gr patate të ziera

4 lugë gjelle vaj ulliri

4 lugë gjelle niseshte patate

2 lugë gjelle parmixhan i grirë

Kripë

Sallam

100 gr djathë emental

Galetë (bukë e thekur e grirë)

Përgatitja:

Ziejmë patatet për 30 minuta, i qërojmë dhe pasi i kemi prerë më parë, i shtypim me ndihmën e një piruni.

Shtojmë në tasin me patate të shtypura vaj ulliri, 4 lugë gjelle niseshte patateje, ose 3 lugë gjelle galetë, 2 lugë gjelle parmixhan i grirë hollë, e përziejmë mirë pataten me miellin dhe djathin.

Shtojmë pak kripë, e përziejmë mirë dhe e lëmë mënjëanë. Djathin e presim në kubikë të vegjël.

Marrim një lugë brum, e hapim duke i dhënë formë të rrumbullakët ose katrore, vendosim mbi formë një copë djathë dhe një fetë sallam. E mbulojmë duke i dhënë formën e një tosti. Kështu vazhdojmë dhe me të tjerat.

Ngrohim një tigan me vaj dhe i skuqim tostet 5 minuta nga secila anë.

D.M./b.ha./Shqiptarja.com

TAG:
• receta
• gjizanik
• rrezedielli
• Tost me patate në tigan