Receta

Të gatuajmë me zonjën Vjollca/ Makarona furre me proshutë dhe Qofte me thjerrëza

Në këtë hapësirë të faqes sonë do të gjeni mënyrën e përgatitjes së recetave të gatimit të përgatitura nga Zonja Vjollca .Këto receta Zonja Vjollca i gatuan çdo ditë në emisionin "Rreze Dielli" nga ora 08:45 -10:00.

Redaksia 4 Dhjetor 2019, 10:51 | Përditesimi: 4 Dhjetor 2019, 11:58

Makarona furre me proshutë

Përbërësit:

LEXO EDHE:
Tavë me lakër arme dhe kimë nga zonja Albana

400 gr makarona Stella

5 lugë gjelle parmixhan i grirë

250 gr proshutë coto

Beshameli:

60 gr gjalp

60 gr miell

600 ml qumësht

Arrëmoskat

Kripë dhe piper i zi

Përgatitja:

Fillimisht përgatisim beshamelin. Shkrijmë gjalpin dhe shtojmë miellin. Sapo mielli të ziejë në gjalp, e shuajmë me qumësht të ngrohtë duke e përzierë vazhdimisht me tel dore derisa beshameli të lidhet (të trashet). Rregullojmë shijen me kripë, piper dhe arrëmoskat.

Në një tenxhere me ujë të valuar kemi shtuar makaronat, ndërkohë i lëmë të ziejnë 3 minuta më pak se koha e duhur për zierje.

Kullojmë makaronat dhe i vendosim në një tas, u shtojmë beshamelin, 2 lugë gjelle djathë parmixhan dhe i përziejmë mirë së bashku. Shtojmë dhe proshutën të prerë në kubikë të vegjël, i përziejmë dhe më pas i shtojmë në një tepsi të lyer me pak gjalp.

Djathin e mbetur e shpërndajmë në të gjithë sipërfaqen sipër makaronave. Vendosim tepsinë në furrë në temperaturë 180 gradë Celsius, për 20-25 minuta.

Qofte me thjerrëza

Përbërësit:

200 gr thjerrëza

1 patate

1 karrotë

1 copë selino (80 gr)

1 thelpi hudhër

4 lugë gjelle parmixhan i grirë

2-3 degë majdanoz

2 lugë gjelle galetë e grirë

Kripë dhe piper i zi

1 vezë

Përbërësit për skuqjen:

4-5 lugë gjelle galetë e grirë

2 vezë

Kripë

Vaj Olim për skuqje

Përgatitja:

Fillimisht shpëlajmë thjerrëzat me ujë të ftohte, qërojmë pataten dhe e presim në kubikë, rrënjën e selinosë, një degë selinoje, karrotën të qëruar dhe të prerë në copëza. Të gjithë këta përbërës i vendosim në një tenxhere, i mbulojmë me ujë në temperaturë ambienti dhe i vendosim në zjarr mesatar për të zierë, për 20 minuta.

Pasi të ketë kaluar kjo kohë dhe të gjithë përbërësit të jenë zier mirë, i transferojmë në një mikser, si psh te grirësja e qepës.

Shtojmë në të djathin parmixhan, majdanozin, pak kripë e piper nga mulliri, galetën e grirë (ose një fetë bukë të thatë të grirë), 1 vezë dhe i kalojmë në mikser të përzihen mirë derisa të na formohet një masë homogjene. Lyejmë duart me vaj dhe formojmë qofte në formë sferike sa një arrë e madhe dhe e vendosim në një pjatë.

Në dy pjata vendosim te e para 2 vezë të rrahura me pak kripë dhe te pjata e dytë 4-5 lugë gjelle galetë të grirë. Kalojmë qoftet fillimisht në vezë e më pas i rrotullojmë në galetë të grirë.

Ngrohim një tigan me vaj Olim dhe më pas i skuqim qoftet derisa të zverdhen. I nxjerrim nga tigani dhe i vendosim në letër kuzhine për t’i larguar pak yndyrën e tepërt. I servirim me sallatë apo me salcën që preferoni.