Receta

Të gatuajmë me zonjën Vjollca: Turli me thjerrëza e perime dhe Omletë me perimet e stinës

Në këtë hapësirë të faqes sonë do të gjeni menyrën e përgatitjes së recetave të gatimit të përgatitura nga Zonja Vjollca .Këto receta Zonja Vjollca i gatuan çdo ditë në emisionin "Rreze Dielli" nga ora 08:45 -10:00

Redaksia 14 Tetor 2019, 10:31 | Përditesimi: 14 Tetor 2019, 11:07

Receta 1

Turli me thjerrëza dhe perime

LEXO EDHE:
Tavë me lakër arme dhe kimë nga zonja Albana

Përbërësit:

1 qepë

3 thelpinj hudhra

2 patate mesatare

2 karrota

2 patëllxhanë

2 kunguj

1 degë selino

2 speca me ngjyrë mix

1/2 gotë thjerrëza

1 domate të madhe

4 lugë gjelle vaj ulliri

1 gjethe Dafinë

Kripë dhe piper i zi, uthull

Majdanoz

Përgatitja:

Shpëlajmë thjerrëzat dhe i vendosim për të zierë në temperaturë mesatare. Pesë minuta pasi të fillojë zierja, i largojmë dhe i kullojmë.

Në një tenxhere ngrohim vajin dhe kavardisim qepën të grirë hollë derisa të zverdhet. Shtojmë hudhrat të prera në copëza dhe i trazojmë së bashku për 1 minutë. Fillimisht shtojmë perimet që duan më shumë kohë për zierje si përshembull karrotën, patetatet e më pas me radhë selinonë, patëllxhanin, kungullin, specat, domatet, të gjitha perimet të prera në kubikë.

Vendosim një gjethe dafine dhe thjerrëzat dhe shtojmë ujë baras me nivelin e perimeve. Rregullojmë shijen me kripë dhe piper të zi dhe e lëmë turlin të ziejë me kapak të mbyllur për 15 minuta. Në fund, shtojmë uthull sipas shijes që preferoni dhe e shërbejmë duke e skërkatur me majdanoz.

Receta 2

Omletë me perimet e stinës

Përbërësit:

100 gr karrota (1 karrotë)

150 gr lakër e bardhë

200 gr spinaq

3 thelpinj hudhra

3 lugë gjelle vaj

Kripë dhe piper i zi

1 lugë gjelle miell

3-4 vezë

Përgatitja:

Pastrojmë karrotën dhe e grijmë me rende. ¼ e një lakre të vogël e grijmë shumë hollë dhe e vendosim në ujë me tas e shpëlajmë mirë dhe e kullojmë dhe e vendosim në një tas me karrotën.

Grijmë spinaqin hollë. Thelpinjtë e hudhrave i presim në copëza të vogla.

Në tigan vendosim 3 lugë gjelle vaj ulliri, hudhrat dhe i kavardisim për 1 minutë.

Shtojmë lakrën e karrotën dhe i kavardisim derisa ato të ulin volumin, shtojmë spinaqin dhe kripën dhe i kullojmë perimet për të larguar ujin e tepërt dhe i vendosim në një tas, shtojmë 1 lugë gjelle miell dhe e përziejmë me perimet e gatuara. Shtojmë 3-4 kokrra vezë (varet nga madhësia).

Ngrohim 3 lugë gjelle vaj, shtojmë vezët dhe perimet dhe vendosim kapakun për 5-8 minuta në temperaturë mesatare. Kthejmë omletën me ndihmën e një pjate dhe përsëri vendosim kapakun dhe për 5 minuta të tjera. E servirim në pjatë të ndarë në 4 pjesë.