Vlorë/ Ekzekutohet me breshëri kallashnikovi në mjetin e tij, 40-vjeçari i arrestuar në 2011-n për vrasje! Pistë hetimi konfliktet që mund të ketë në Spanjë, nga ishte kthyer para një muaji

Viktima Bledar Birçaj

Personi që shihni në foton më lart është Bledar Birçaj, 40-vjeçari i cili u ekzekutua me breshëri kallashnikovi mesditën e sotme në Vlorë, teksa udhëtonte me mjetin e tij tip BMW.

Atentati ndodhi në zonën e quajtur ‘Bishti i Kalldrëmit’, ndërsa humbi jetën në spitalin e Vlorës. Burimet bëjnë me dije se kanë qenë disa personat që kanë qëlluar, por nuk ka ende persona të dyshuar të si të përfshirë në këtë ngjarje. Policia raporton se grupi hetimor nën drejtimin e Prokurorisë ndodhet në vendngjarje dhe po punon për zbardhjen e plotë të  rrethanave të ngjarjes.

40-vjeçari i ekzekutuar  në Vlorë Bledar Birçaj, sipas burimeve të Report Tv kishte një muaj që ishte kthyer nga Spanja. Nuk dihet me se merrej 40-vjeçari andej, por një nga pistat e hetimit janë edhe konfliktet e Birçajt që mund të ketë pasur në Spanjë.

Bledar Birçaj i cili u ekzekutua ditën e sotme me breshëri kallashnikovi, ishte i shoqëruar në makinë nga një person tjetër.  Burime për Report Tv bëjnë me dije se personi që ishte në makinë me Birçajn në momentin kur ka ndodhur atentatit është larguar me vrap. 

Makina tip BMW ku udhëtonte Bledar Birçaj gjatë ekzekutimit të tij në Vlorë, po largohet nga vendi i ngjarjes. Në makinë duken qartë shenjat e plumbave që janë shtënë nga 40-vjeçarit ndaj të cilit është qëlluar 10 herë.

Ky është momenti kur trupi i viktimës Bledar Birçaj është duke u dërguar në morg, pasi ka ndërruar jetë nga breshëria e plumbave më të cilat u qëllua mesditën e sotme. Sipas policisë Birçaj mbeti i plagosur pas të shtënave dhe më pas u transportua në spitalin e Vlorës ku dhe ka ndërruar jetë.

Bledar Birçaj, 40-vjeçari i cili u ekzekutua mesditën e sotme nga një breshëri kallashnikovi në Vlorë, ishte pronar i bar-kafe ‘Boss’ në këtë qytet.

Në ekstraktin e QKB rezulton se Bledar Birçaj ishte pronar i një biznesi në fushën e veprimtarisë bar-kafe, birrari dhe tregti me pakicë e artikujve të ndryshëm.

Lokali 'Boss' në Vlorë

40-vjeçari i cili u ekzekutua sot në Vlorë me breshëri kallashnikovi në Vlorë ka qenë më parë i përfshirë në një tjetër ngjarje kriminale.

Së bashku me vëllain e tij Eltonin, Bledar Birçaj, atë kohë 27 vjeç, kanë masakruar me grushte juristin e Zyrës Vendore të Regjistrimit të Pasurive të Paluajtshme, personin me inicialet F. H. Ata e kanë dhunuar punonjësin e hipotekës për shkak të detyrës. Për këtë në atë kohë prokuroria nisi procedim penal në gjendje të lirë për dy të rinjtë.

Pamja nga vendi i ngjarjes

Bledar Birçaj, i ekzekutuar sot në Vlorë, nuk ishte një emër i panjohur për drejtësinë. Në janar të 2011 ai u arrestua  në Vlorë si i dyshuar për vrasjen e Artur Tahirajt. Birçaj në atë kohë iu vendos masa e arrestit me burg me afat 45 ditë. Gjithashtu, Gjykata e Rrethit Gjyqësor Vlorë me vendimin  të marsit 2011, ka caktuar si masë sigurimi “arrestit në burg” pa afat.

Në prill masa ndaj tij ndryshoi nga Gjykata e Vlorës nga “arrest në burg” me masën e sigurimit “detyrim paraqitje në policinë gjyqësore” dhe masën detyruese “ndalim të daljes jashtë shtetit” deri në përfundim të hetimeve. Por në korrik 2011 u vendos  pushimi i hetimit penal në ngarkim të Bledar Birçaj  duke u lënë i lirë. Madje Bledar Birçaj për këtë çështje mori edhe dëmshpërblim. 

Policia ka dhënë informacionin zyrtar për vrasjen e para pak minutave në Vlorë.

"Në lagjen “Hajro Çakërri”, Vlorë, në rrethana  ende të paqarta është qëlluar me armë zjarri në drejtim të automjetit tip” BMË” me drejtues shtetasin. B. B rreth 40 vjeç ,i cili si pasojë e plagëve të marra është transportuar në spitalin e Vlorës, ku dhe ka ndërruar jetë. Grupi hetimor nën drejtimin e Prokurorisë  ndodhet nē vendngjarje dhe po punon për zbardhjen e plotë të  rrethanave të ngjarjes. Shërbimet e Policisë të D.V.P. Vlorë, të Komisariatit të Policisë Vlorë   po krehin zonën si dhe janë ngritur pika kontrolli me qëllim  kapjen e autorit"

Personi i cili ka mbetur i plagosur sot në Vlorë nga të shtënat më armë ka ndërruar jetë në spital.

Report Tv ka siguruar pamje nga vendngjarja në Vlroë, ku pas të shtënave me armë zjarri raportohet se ka të plagosur. Makina në pamje e tipit BMË është automjeti në drejtim të të cilit është qëlluar.