Tefta, mos u ndje fajtore, jeto për djalin e mbijetuar!

Tefta është gruaja 39-vjeçare e cila u sulmua nga bashkëshorti i saj në Torremaggiore, në zonën e Foggia. Ajo shpëtoi, por vajza 16-vjeçare që u përpoq ta mbronte nuk mundi! Gessica vdiq nga goditjet e babait të saj mes natës së të shtunës dhe të dielës.

Ajo nuk është vajza e parë që pëson këtë fat. Më 11 maj 2021, edhe Mirko Farci, 19 vjeç, humbi jetën duke mbrojtur nënën e tij nga agresioni i ish-partnerit të saj, Masih Shaid në Tortolì të Sardenjës.

Nëna e tij, Paola Piras, 52 vjeçe e goditur 18 herë me thikë me dhunë nga burri me të cilin kishte vendosur të ndahej, shpëtoi për një fije. Pas 40 ditësh në koma, gjëja e parë që pyeti ishte për Mirkon. 

Dhe, siç tregon ajo në një letër drejtuar Corriere della Sera, asaj i thanë se ai nuk ia kishte dalë. Sot Paola Piras i shkruan Teftës duke i thënë: Nuk njihemi, por ndajmë të njëjtin fat të keq.

Paola Piras kishte vendosur ta linte të dashurin e dhunshëm Shaidin, një pakistanez 31-vjeçar. Më 11 maj 2021 në të gdhirë ai kishte hyrë në shtëpi pavarësisht ndalimit për t'u afruar, pasi gruaja i kishte shkruar asaj mbrëmjen e kaluar: "Nëse nuk më lë rehat, do të telefonoj karabinierët.”

Sulmi atë mëngjes kishte zgjuar Mirkon, i cili doli para për të mbrojtur të ëmën. Nuk mbaj mend asgjë, shkruan ajo sot, por më thanë se kur erdhi ndihma po përkëdhelja djalin tim që tashmë kishte vdekur. 

Prokurorja Giovanna Morra, gjatë gjykimit, kishte shpjeguar se "Djali u përpoq që të shuante sherrin mes nënës së tij dhe Masih Shaid. Ai me naivitet mendoi se mund të menaxhonte sjelljen e dhunshme të tij, derisa të kalonte çdo kufi të tolerancës njerëzore". 

Por sot gruaja i drejtohet Teftës duke i kërkuar gjithashtu që të mos dëgjojë akuzat e të tjerëve dhe të mos e mundojë veten me ndjenja faji, duke jetuar mbi të gjitha në emër të fëmijës që ka mbetur gjallë, djalit 5 vjeç që dje i shpëtoi me guxim tërbimit vrastar të të atit./ La Repubblica

M.Q./Shqiptarja.com

TAG:
• tefta malaj
• taulant malaj