Për një lider që “nuk i ka letrat” për të fituar kundër luftës pushtuese ruse, Volodymyr Zelensky po tregohet vërtet shumë i qëndrueshëm. Realiteti në fushat e betejës tregon me një rregullsi mbresëlënëse dhe të vazhdueshme se Donald Trump, edhe në kontekstin e konfliktit ruso-ukrainas, ka bërë një tjetër gabim të bujshëm vlerësimi dhe se deklaratat e tij agresive të 28 shkurtit 2025 nuk kanë pasur kurrë asnjë bazë konkrete. Prova e re ka ardhur orët e fundit në zonat e rajonit të Kherson, ende të pushtuara nga rusët në lindje të lumit Dnipro, ku dronët e Kievit, me një saktësi vdekjeprurëse, kanë shkatërruar selinë e inteligjencës ruse.

Risia mes prillit dhe majit është se jo vetëm avancimi rus në Donbas, aq shumë i propaganduar nga Vladimir Putin gjatë gjithë vitit të kaluar, është bllokuar, ngecur dhe praktikisht është mbytur në gjakun e ushtarëve të vrarë nga dronët në sulme të kota, por mbi të gjitha se këmbësoria ukrainase, në më pak se 30 ditë, ka arritur të çlirojë të paktën 113 kilometra katrorë territore të pushtuara. Bëhet fjalë për “rikthimin” e parë territorial që nga gushti i vitit 2024, pas atyre të rëndësishme të tetor-nëntorit 2022.

Duhet kujtuar se rusët sot ende kontrollojnë rreth 20 për qind të territorit ukrainas, sipas kufijve të njohur ndërkombëtarisht (edhe nga vetë Moska) në momentin e pavarësisë në vitin 1991, përfshirë edhe Crimea dhe zonat lindore të “rrëmbyera” nga Putini me forcë ushtarake në vitin 2014.

Por këto përmbledhje të shkurtra historike ndihmojnë për të nënvizuar një fakt që ka qenë i dukshëm që në muajt e parë pas pushtimit të nisur nga Putini më 24 shkurt 2022: diktatori rus synonte një fitore të shpejtë. Ai donte gjithçka menjëherë: rënien e Kievit, eliminimin e Zelenskyt, shkatërrimin e ushtrisë ukrainase dhe nënshtrimin e saj ndaj Moskës, së bashku me industrinë ushtarake dhe sistemin ekonomik. Asgjë nga këto nuk ndodhi: Ukraina vazhdon të rezistojë, të luftojë dhe çdo ditë që kalon përfaqëson një humbje për Putinin. Tani, shumë komentatorë, edhe ata që kishin mbajtur një qëndrim më të kujdesshëm, kanë nisur të thonë se era e epërsisë strategjike po fryn në favor të Kievit.

Me pak fjalë, Rusia po has vështirësi, po vuan nga të njëjtat probleme të mungesës së rekrutëve të rinj që penalizojnë edhe ukrainasit, por dronët e saj duken më pak të avancuar teknologjikisht. Zelenskyn e ndihmojnë edhe 90 miliardë eurot e miratuara së fundmi nga Europa pas humbjes elektorale të Viktor Orban. Dhe presidenti ukrainas nuk ndalet. Trump i “injoron” dronët e tij kundër Iranit? Nuk ka problem: Zelensky firmos kontrata me Emiratet e Bashkuara Arabe, të cilat kërkojnë një mburojë më të sigurt kundër kërcënimit të ajatollahëve të Teheran, punon krah për krah me industrinë tashmë shumë të financuar të armëve në Gjermani dhe bashkëpunon në shumë nivele me europianët, sidomos me Suedi, Finlandë, Danimarkë dhe republikat baltike.

Mes arkitektëve kryesorë të shtysës ukrainase është edhe ministri i ri 35-vjeçar i Mbrojtjes, Mykhailo Fedorov, apostull i përdorimit ushtarak të dronëve. Vetë ai, sapo u emërua në janar, kishte folur për “matematikën e luftës”, pra zgjedhjen për të llogaritur, kuantifikuar shkencërisht dhe studiuar strategjitë ruse të sulmit, përfshirë bombardimet ndaj qyteteve, për të gjetur përgjigjet e duhura strategjike. Dje u bënë publike disa deklarata të tij të 16 majit, ku ai ritheksonte se synon të “eliminojë” rreth 50 mijë ushtarë rusë në muaj, nga rreth 35 mijë që sipas tij kanë qenë muajt e fundit, dhe njëkohësisht të “lodhë ekonominë ruse”, në mënyrë që të pengohet zëvendësimi i humbjeve dhe kështu “ta detyrojë armikun të kërkojë paqe”.

Sipas tij, sulmet me dronë nga Rusia janë rritur me 35 për qind çdo muaj, por tashmë dronët ukrainas synojnë të godasin në ajër 95 për qind të tyre dhe sulmet në hapësirën ajrore ruse janë bërë shumë më të shumta. Dronët e rinj ukrainas kryejnë misione në një rreze që afrohet me 2 mijë kilometra, kanë goditur rafineritë e Perm në Ural, si dhe kanë nxjerrë jashtë funksionit terminalet e gazit dhe naftës në Deti i Zi. Lufta vazhdon dhe letrat në duart e Zelenskyt duken më të mira se më parë./ Corriere della Serra