Është zhvilluar në tension gara për dekan në Fakultetin e Historisë dhe Filologjisë. Kandidati për dekan në këtë fakultet, prof. Sabri Laçi ka depozituar pranë Komisionit Institucional të Zgjedhjeve një ankesë për procesin zgjedhor.

Sipas tij, pas përfundimit të procesit të votimit është shkelur rregullorja për të deformuar votën e zgjedhësve, me qëllim grabitjen e mandatit. Të fshehur pas kësaj, prof. Laçi deklaron se janë ish-drejtues të këtij institucioni.

“Drejtues dhe ish-drejtues të Universitetit. Janë mësuar ta kenë Universitetin nën kontroll dhe duan të vazhdojnë të bëjnë të njëjtën gjë”, tha prof. Laçi.

Ndërkohë, kryetarja e Komisionit të Zgjedhjeve të Fakultetit, Rozana Rushiti në vlerësimin e saj ka shpallur rezultatin e votimit për kandidatët për dekan, ku prof. Sabri Laçi ka 50.139 % të votave të fituara, ndërsa kandidatja tjetër prof. Aljula Jubani ka 49. 86% të votave.

 “Këtu u duk sikur realisht u zgjat procesi, e në fakt u zgjat procesi sepse mendohej që duhej të ishte përfunduar më herët. Shpallësi i saj ishte përqindja”, u shpreh kryetarja e KZF

Në një prononcim për Report Tv, kandidatja për dekane e Fakultetit të Historisë dhe Filologjisë, prof. Aljula Jubani deklaron se ky proces i zhvilluar me mosmarrëveshje nuk duhet të zgjatej dhe të tensionohej, për hir të modelit që u japin studentëve.

 “Në të gjithë këtë situatë kaotike e absurde që është krijuar,ajo që është e rëndësishme është të ruhet dinjiteti i studenti, të ruhet dinjiteti i pedagogut”, deklaroi Jubani.

Pas vlerësimit të KZF, ku rezulton me një diferencë të vogël votash fitues prof. Laçi, ky i fundit ka deklaruar sërish se do i shkoj në fund animimit.

Megjithatë, rezultati final mbetet në dorën e Komisionit Institucional të Zgjedhjeve.

 “Shpalljen e rezultateve e dërguam në një institucion që është më lart se sa ne që është KIZ-i, dhe më pas KIZ vazhdon procedurën më tej për shpalljen e fituesit sipas përcaktimeve të rregullores së Ministrisë së Arsimit”, tha kryetarja  komisionit të fakultetit.

 

Redaksia Online
J.Sh Shqiptarja.com