Në KZAZ numër 27 në shkollën "Ibrahim Rugove" në Kamëz, zyrtarë të bashkisë së drejtuar nga Xhelal Mziu dhe militantë të Partisë Demokratike, hapën me forcë derën kryesore të shkollës. Kjo situatë e tensionuar u bë shkak që policia të detyrohej të hidhte gazin lotësjellës, për të shpërndarë turmën.

Rendit zhvillimet sipas orarit:
Ora 11:26
PAMJE TË REJA/ Momenti kur zyrtarët e Bashkisë Kamzë dhe militantët mësyjnë në shkollë, si shpërndahen nga gazi lotsjellës

Ky është momenti kur zyrtarë të PD-së në Bashkinë Kamëz, militantë të kësaj force dhe punonjës të policisë Bashkiake, mësyjnë në shkollën "Ibrahim Rugova". Ata kanë hapur me forcë portën kryesore të shkollës, ku në një nga klasat ndodhet KZAZ numër 27. Në këto momente, siç dhe shihet në video, policia ka hedhur gaz lotsjellës ndaj tyre duke shpërndarë turmën.

G.M./Shqiptarja.com

Ora 11:10
Nënkryetari i Bashkisë Kamëz: Lleshaj dhe kopukët e tij të arrestojnë Presidentit dhe ne tërhiqemi (VIDEO)

Një ditë më parë, nënkryetari i Bashkisë së Kamzës shoqëruar me efektivë të Policisë Bashkiake shkuan në shkollën "Ibrahim Rugova" ku është instaluar KZAZ numër 27 në këtë zonë, për të kërkuar largimin e materialeve zgjedhore pasi sipas tij duhet zbatuar dekreti i Presidentit Ilir Meta që ka anuluar zgjedhjet. Policia e Rendit është në ruajtje të KZAZ-së pas kërkesës së Komisionit Qendror të Zgjedhjeve që vijon me procesin zgjedhor të 30 qershorit pasi e ka konsideruar nul dekretin e Presidentit.

Nënkryetari i Bashkisë Vendim Demaj tha se shkaun sërish sot në këtë KZAZ për të parë nëse janë larguar materialet zgjedhore por situata ka përshkallëzuar në dhunë. Policët bashkiakë kaluan portën kryesore të shkollës duke tentuar të futen në klasa, por policia u detyrua të hedhë gazin lotsjellës. Nënkryetari i bashkisë që drejtohet nga Xhelal Mziu, tha se nëse duan që kjo situatë të përfundojë atëherë ministri i Brendshëm të arrestojë Presidentin Meta, por përsakohë ai është në detyrë dhe ka një dekret, ai u shpreh se do të bëjnë çmos për të mos lejuar që zgjedhjet të mbahen më 30 qershor. 

"Ramë në dhunën e policisë me shkopa gome dhe në gazin lotsjellës. Ku është gaz luftarak që përdoret në Serbi, se unë e kam provuar edhe në Serbi. Kemi dy efektivë të Policisë Bashkiake të plagosur. Njëri është në reanimacion, shpresojmë të shpëtojmë. Ne i paralajmëruam dje të lirojnë KZAZ dhe sot shkuam të kontrollojmë nëse materialet zgjedhore janë hequr. Presidenti i Republikës është në krye të detyrës dhe dekreti është i botuar në Fletore zyrtare, ndryshe ministri Lleshaj dhe kopukët e tij të arrestojnë Presidentit dhe ne tërhiqemi", u shpreh nënkryetari i Bashkisë së Kamzës, Vendim Demaj.

G.M./Shqiptarja.com

Ora 10:32
Përplasje në Kamëz, militantët tentuan të shqyejnë derën ku ndodhet KZAZ-ja, policia gaz lotsjellës (VIDEO)

Punonjësit e bashkisë së Kamzës që drejtohet  nga Xhelal Mziu, përfaqësues i PD-së, të mbështetur edhe nga militantë të shumtë të opozitës paraditen e sotme mësynë në shkollën 'Ibrahim Rrugova' ku është vendosur KZAZ-ja nr. 27. Pas tensionimit të situatës, ata tentuan që të shqyejnë me forcë derën e shkollës për të marrë dhe shkatërruar materialet zgjedhore. Në këtë moment ka ndërhyrë policia duke hedhur gaz lotsjellës për të shpërndarë turmën që ndodhej para shkollës. Situata për momentin është qetësuar, por militantët nuk janë larguar.